అయ్యప్ప స్వాముల సేవలో అపూర్వ భక్తి.. పాలెపు రామారావు ఔదార్యం! 80 మంది స్వాములకు సొంత ఖర్చుతో బిక్షసేవాభావాన్ని చాటుకుంటున్న చెన్నూరు సొసైటీ అధ్యక్షులు*

సూర్య, కల్లూరు  అయ్యప్ప స్వామి మాలధారణ చేపట్టిన భక్తులకు సేవ చేయడం ఆ భగవంతుడికి సేవ చేసినట్లేనని భావిస్తూ,చెన్నూరు సొసైటీ అధ్యక్షులు పాలెపు రామారావు తన ఔదార్యాన్ని చాటుకుంటున్నారు. కల్లూరు మండల పరిధిలోని చెన్నూరు గ్రామపంచాయతీ పరిధి రావికంపాడు గ్రామానికి చెందిన రామారావు అయ్యప్ప దీక్ష చేపట్టడంతో పాటు, దీక్షలో ఉన్న 80 మంది స్వాములకు తన స్వగృహంలో నిత్యం అల్పాహారం, భిక్ష ఏర్పాటు చేస్తూ, గ్రామ ప్రజలకు ఆదర్శంగా నిలుస్తున్నారు.

అయ్యప్ప దీక్షలో భాగంగా నియమ నిష్ఠలతో పూజలు నిర్వహిస్తున్న స్వాములకు ఎలాంటి ఇబ్బందులు కలగకూడదనే సంకల్పంతో రామారావు ఈ అన్నదాన కార్యక్రమాన్ని చేపట్టారు. ప్రతిరోజూ స్వాములకు అవసరమైన అల్పాహారం, భోజనాన్ని తన సొంత ఖర్చులతో సమకూరుస్తూ భక్తి భావాన్ని సేవా మార్గంలో చాటుకుంటున్నారు.

ఈ కార్యక్రమానికి అవసరమైన బియ్యం, కూరగాయలు, ఇతర వంట సామగ్రిని సైతం తన సొంత పైకం తోనే కొనుగోలు చేస్తున్నారు. వంటలు తయారు చేసే వంట మనిషితో పాటు సహాయకులకు కూడా తన స్వంత ఖర్చులతో పారితోషికం అందిస్తూ, అన్నదాన కార్యక్రమం నిరంతరాయంగా కొనసాగేందుకు ప్రత్యేక శ్రద్ధ తీసుకుంటున్నారు.

అయ్యప్ప స్వాముల సేవను ఒక బాధ్యతగా కాకుండా, స్వామివారి అనుగ్రహంతో లభించిన భాగ్యంగా భావిస్తున్న రామారావు సేవానిరతిని గ్రామస్థులు, దీక్షలో ఉన్న స్వాములు ప్రశంసిస్తున్నారు. భక్తి అంటే కేవలం పూజలు, దీక్షలకే పరిమితం కాకుండా తోటి భక్తులకు సేవ చేయడంలోనూ ఉందని ఆయన ఆచరణలో చూపిస్తున్నారు.

*అన్నదానమే మహాదానం.. సేవే నిజమైన భక్తి!*

అయ్యప్ప స్వాముల పట్ల భక్తి, తోటి భక్తుల పట్ల ఆప్యాయత, సేవ చేయాలనే తపన కలగలిపి పాలెపు రామారావు చేపడుతున్న ఈ అన్నసంతర్పణ కార్యక్రమం పలువురికి స్ఫూర్తిగా నిలుస్తోంది. స్వాములకు ఆహారం అందించడంలోనే అయ్యప్ప స్వామి ఆశీస్సులు ఉన్నాయని భావిస్తూ ఆయన చేస్తున్న సేవను గ్రామస్థులు అభినందిస్తున్నారు.

సూర్య ఉమ్మడి ఖమ్మం జిల్లా బ్యూరో చీఫ్ పసుపులేటి సత్యనారాయణ