అయ్యప్ప భక్తుల యాత్రకు శ్రీకారం చుట్టిన టీబీజీకేఎస్‌ నేత కేతిరెడ్డి సురేందర్‌రెడ్డి

సూర్య నస్పూర్‌ :శ్రీరాంపూర్‌ నుంచి శబరిమలకు అయ్యప్ప భక్తులు చేపట్టిన మహా పాదయాత్రను టీబీజీకేఎస్‌ రాష్ట్ర ప్రధాన కార్యదర్శి కేతిరెడ్డి సురేందర్‌రెడ్డి శుక్రవారం ప్రారంభించారు. శ్రీరాంపూర్‌ కాలనీకి చెందిన బోడ రామకృష్ణ, ఎగ్గడి వినోద్‌కుమార్‌, గాదాసు కళ్యాణ్‌ అయ్యప్ప మాల ధరించి, సుమారు 1,400 కిలోమీటర్ల పాదయాత్రకు శ్రీ భక్తాంజనేయ స్వామి ఆలయం నుంచి బయలుదేరారు. ఈ కార్యక్రమంలో అఖిల భారత అయ్యప్ప ధర్మప్రచార సభ (ఏబీఏపీ) శ్రీరాంపూర్‌ అధ్యక్షుడు బొడ్డు లక్ష్మణ్‌, రాష్ట్ర మీడియా ఇన్‌చార్జి భాస్కరి రాజేశం పాల్గొన్నారు. అంతకుముందు ఆలయంలో గురుస్వామి సంగనబట్ల నరహరి ఆధ్వర్యంలో ప్రత్యేక పూజలు నిర్వహించి, భక్తులకు ఇరుముడి కట్టారు. అనంతరం శ్రీరాంపూర్‌ కాలనీ అయ్యప్ప సేవా సన్నిధానం గురుస్వాములు పాదయాత్ర చేస్తున్న భక్తులను శాలువాలతో ఘనంగా సన్మానించారు.ఈ సందర్భంగా గురుస్వాములు మాట్లాడుతూ, భక్తులు పంబా నదికి చేరుకుని, 45వ రోజు శబరిమలలో అయ్యప్ప స్వామిని దర్శించుకోనున్నట్లు తెలిపారు. పాదయాత్ర విజయవంతంగా సాగాలని, భక్తులు క్షేమంగా స్వామివారి సన్నిధికి చేరుకోవాలని ఆకాంక్షించారు. ఈ కార్యక్రమంలో వంగ శివ, సుంకెనపల్లి రాజేందర్‌, సాధు వీరభద్రస్వామి, రామలింగం, రవికృష్ణ, తదితరులు పాల్గొన్నారు.