అమరుల త్యాగాలను మరువలేము - సోమశిల దుర్ఘటన జరిగి నేటితో 33 సంవత్సరాలు పూర్తి

నాగర్ కర్నూల్ క్రైమ్ , సూర్య న్యూస్: అమరుల త్యాగాలను స్మరించుకుంటూ శాంతి భద్రతల పరిరక్షణకు సిబ్బంది కృషి చేయాలని జిల్లా అదనపు ఎస్పీ నోముల వెంకటేశ్వర్లు అన్నారు. సోమశిల దుర్ఘటనలో మృతి చెందిన పోలీసు అమరవీరులకు ఎస్పీ కార్యాలయంలో శనివారం పూలమాల వేసి నివాళులు అర్పించారు. ఈ సందర్భంగా అదనపు ఎస్పి మాట్లాడుతూ  పీపుల్స్ వార్ గ్రూపు ప్రాబల్యం ఎక్కువగా ఉమ్మడి మహబూబ్నగర్ జిల్లాలో  ఉండటంతో అప్పటి ఎస్పీ పరదేశి నాయుడు నక్సల్స్ అరాచకాలను అరికట్టడానికి అనేక చర్యలు తీసుకోవడం జరిగిందని తెలిపారు.  పీపుల్స్ వార్ గ్రూప్ వారు ఎస్పీ పై ఎలాగైనా కక్ష తీర్చుకోవాలని ప్రయత్నించారు.  సోమశిల లోని ఫారెస్ట్ అతిధి గృహాన్ని మావోయిస్టులు పేల్చి వేశారన్న సమాచారం అందుకున్న ఉమ్మడి జిల్లా ఎస్పీ పరదేశి నాయుడు తన సిబ్బందితో కలిసి నవంబర్ 14న సోమశిల వెళ్లారని,  సమాచారం అందుకున్న మావోయిస్టులు ఆయన తిరుగు ప్రయాణం లో ప్రయాణిస్తున్న బస్సు శుద్ధగట్టు మలుపు వద్దకు రాగానే ముందే అమర్చుకున్న మందు పాత్ర పేల్చడంతో ఆ దుర్ఘటనలో ఎస్పీ తో పాటు మిగిలిన సిబ్బంది అక్కడికక్కడే వీరమరణం పొందారనీ ఈ దుర్ఘటన రాష్ట్ర పోలీస్ చరిత్రలో ఒక విషాద ఘట్టంగా మిగిలిందని తెలిపారుఈ దుర్ఘటనలో  పరదేశి నాయుడు తో పాటు ,ఎస్సైలు కిషోర్ కుమార్, శివ ప్రసాద్,హెడ్ కానిస్టేబుల్ రంగారెడ్డి , కానిస్టేబుళ్లు ఎన్ ప్రసాద్ , సుభాన్ , జహాబ్ ఇక్బాల్ ,జయ రాములు,షైక్ హైదర్ లు వీరమరణం పొందినట్టు తెలిపారు. త్యాగాలను స్మరించుకుంటూ నేటితరం పోలీసులు ఆయన ఆశయాలు, ఆదేశాలు తప్పకుండా పాటించాలని ఆత్మస్థైర్యం కోల్పోకుండా పోలీసులు ధైర్య సాహసాలు ప్రదర్శించాలని తెలిపారు. కార్యక్రమంలో ఆర్ ఐ జగన్, రాఘవరావు, స్పెషల్ బ్రాంచ్ ఎస్సై బీజ్జ.శ్రీనివాసులు, ఆర్ఎస్ఐలు శివాజీ, గౌస్ పాషా, ప్రశాంత్, కళ్యాణ్, రాంరెడ్డి లతోపాటు జిల్లా పోలీస్ కార్యాలయ సిబ్బంది పాల్గొన్నారు.
----