ఘట్‌కేసర్, మేజర్ న్యూస్(అక్టోబర్, 24): ప్రపంచ శాంతి, అంతర్జాతీయ ఐక్యత, సాంస్కృతిక సమైక్యతే లక్ష్యంగా హైదరాబాద్‌లో నిర్వహించిన ఐక్యరాజ్యసమితి దినోత్సవ వేడుకల్లో రోటర్‌డామ్ ఇంటర్నేషనల్ స్కూల్ విద్యార్థులు పాల్గొన్నారు. పాఠశాల ప్రిన్సిపల్‌ కె. రూపా రెడ్డి విద్యార్థులతో కలిసి ఈ కార్యక్రమానికి హాజరయ్యారు. సంజీవయ్య పార్క్‌, నెక్లెస్‌ రోడ్‌ వద్ద ఇంటర్నేషనల్ కమిషన్ ఆఫ్ కల్చర్ అండ్ డిప్లొమాటిక్ రిలేషన్స్‌ (ఐసీసీడీఆర్‌), ఫిల్వెక్స్ హాబీ సొసైటీ, ఇండియన్ వెక్సిలాలజికల్ అసోసియేషన్‌ సంయుక్తంగా ఈ వేడుకలను నిర్వహించాయి. తెలంగాణ ప్రభుత్వ ప్రత్యేక ప్రధాన కార్యదర్శి జయేష్‌ రంజన్‌ ముఖ్య అతిథిగా పాల్గొని భారత జాతీయ పతాకంతో పాటు ఐక్యరాజ్యసమితి పతాకాన్ని ఆవిష్కరించారు. వివిధ దేశాల జాతీయ పతాకాలను చేతబూని స్కౌట్స్‌ అండ్ గైడ్స్‌ సభ్యులు నిర్వహించిన ఆరు కిలోమీటర్ల మార్చ్‌పాస్ట్‌ వేడుకల్లో ప్రత్యేక ఆకర్షణగా నిలిచింది. సంజీవయ్య పార్క్‌లోని భారీ జాతీయ పతాకం నుంచి నెక్లెస్‌ రోడ్‌ వరకు సాగిన ఈ ప్రదర్శన అంతర్జాతీయ స్నేహసంబంధాలు, ఐక్యత సందేశాన్ని చాటిచెప్పింది. ప్రపంచ శాంతి, సమానత్వం, పర్యావరణ పరిరక్షణ, ఐక్యరాజ్యసమితి సుస్థిర అభివృద్ధి లక్ష్యాలపై జరిగిన ప్రసంగాలు విద్యార్థుల్లో అంతర్జాతీయ అంశాలపై అవగాహన పెంపొందించేలా సాగాయి. విద్యార్థుల్లో ప్రపంచ పౌరసత్వ భావనను పెంపొందించడం, విభిన్న సంస్కృతుల పట్ల గౌరవాన్ని అలవర్చడం లక్ష్యంగా పాఠశాల ప్రతినిధులు ఈ కార్యక్రమంలో భాగస్వాములయ్యారు. అనంతరం వివిధ రంగాల్లో సేవలందించిన ప్రముఖులకు సన్మానాలు, పురస్కారాలు అందజేశారు. ఫిల్వెక్స్ హాబీ సొసైటీ వ్యవస్థాపకుడు సంజీవ రావు కంభంపాటి కార్యక్రమ నిర్వహణలో కీలక పాత్ర పోషించారు.
