టీజేఎస్‌లో చేరికల జోరు
ఘట్‌కేసర్‌లో మేడ్చల్ జిల్లా కమిటీ సమావేశం.. సర్కిళ్లకు బాధ్యుల నియామకం
ఘట్‌కేసర్, మేజర్ న్యూస్ (అక్టోబర్ 4):
తెలంగాణ జన సమితి (టీజేఎస్‌)ను మేడ్చల్ జిల్లాలో క్షేత్రస్థాయి నుంచి మరింత బలోపేతం చేసేందుకు నాయకులు, కార్యకర్తలు సమన్వయంతో పనిచేయాలని పార్టీ రాష్ట్ర ఇన్‌చార్జి పల్లె వినయ్‌కుమార్ సూచించారు. ఆదివారం ఘట్‌కేసర్‌లో టీజేఎస్‌ మేడ్చల్ జిల్లా కమిటీ సమావేశం జిల్లా అధ్యక్షుడు మారం లక్ష్మారెడ్డి అధ్యక్షతన నిర్వహించారు. రాష్ట్ర కమిటీ సభ్యుడు ఎం.అశోక్‌రెడ్డి ముఖ్య అతిథిగా హాజరయ్యారు.ఈ సందర్భంగా జిల్లాలో పార్టీ బలోపేతం, ప్రజా సమస్యలపై పోరాటం, సంస్థాగత నిర్మాణంపై విస్తృతంగా చర్చించారు. మేడ్చల్ జిల్లాలోని అన్ని సర్కిళ్లకు పార్టీ బాధ్యులను నియమించారు. కార్మిక విభాగం జిల్లా అధ్యక్షుడిగా సూరం నరసింహులును నియమించారు. ఘట్‌కేసర్ మున్సిపల్ అధ్యక్షుడిగా బచ్చు ప్రమోద్ గుప్తాను ఏకగ్రీవంగా ఎంపిక చేశారు.
పలువురు టీజేఎస్‌లో చేరిక
కాగా, ఘట్‌కేసర్‌కు చెందిన కృష్ణారెడ్డి, మాణిక్యంతో పాటు పలువురు మైనార్టీ నాయకులు, కార్యకర్తలు పెద్ద సంఖ్యలో టీజేఎస్‌లో చేరారు. వారికి పార్టీ నాయకులు కండువాలు కప్పి పార్టీలోకి ఆహ్వానించారు. రానున్న రోజుల్లో మరిన్ని చేరికలు జరిగేలా నాయకులు కృషి చేయాలని సమావేశంలో పిలుపునిచ్చారు.ఈ కార్యక్రమంలో జిల్లా ప్రధాన కార్యదర్శి ఏర్పుల దయాకర్, ఉపాధ్యక్షులు శ్రీనివాస్, వెంకటాచారి, ఆర్గనైజింగ్ సెక్రటరీలు లక్ష్మణ్, రవి, దయాకర్ గౌడ్, జాయింట్ సెక్రటరీ రాజు ముదిరాజు, కోశాధికారి సుమంత్, అధికార ప్రతినిధి ప్రవీణ్ ఆర్య, మహిళా సంఘం అధ్యక్షురాలు సుకన్యతో పాటు జిల్లా కమిటీ సభ్యులు, నాయకులు, కార్యకర్తలు పెద్ద సంఖ్యలో పాల్గొన్నారు.
రిపోర్టర్ గుర్రం రమేష్.
