సంధ్యా వేళలో కనువిందు చేసిన సూర్యుడు

సంధ్యా వేళలో కనువిందు చేసిన సూర్యుడు

కోహిర్ ; సాయంకాల సంధ్యా వేళలో అస్తమిస్తున్న సూర్యుడు ప్రకృతి ప్రేమికులను కనువిందు వైచేశాడు.రోజంతా తన కాంతులతో వెలుగులు పంచిన సూర్యుడు పశ్చిమ దిక్కున నెమ్మదిగా ఒదిగిపోతూ ఆకాశాన్ని రంగుల హరివిల్లుగా మార్చాడు.కాషాయ,ఎరుపు, పసుపు వర్ణాలు ఆకాశమంతా పరుచుకోవడంతో ఆహ్లాదకరమైన వాతావరణం నెలకొంది.
అస్తమయ సూర్యుడి బంగారు కిరణాలు పచ్చని పంట పొలాలపై పరుచుకోవడంతో పొలాల అందం మరింత ఇనుమడించింది.గాలికి మెల్లగా ఊగుతున్న పంట మొక్కలపై సూర్యకిరణాలు పడుతూ మెరుపులు మెరిపించాయి.గ్రామీణ ప్రాంతంలోని చెట్ల వరుసలు సూర్యాస్తమయ కాంతిలో నీలినీడలుగా మారి ప్రకృతి చిత్రపటాన్ని తలపించాయి.విండ్ పవర్ టవర్ రెక్కల మధ్యలోకి సూర్యుడు వచ్చిన దృశ్యం ప్రత్యేక ఆకర్షణగా నిలిచింది.ఈ రెక్కల మధ్య ఎర్రటి సూర్యబింబం ఒదిగిపోయిన తీరు ప్రకృతి,ఆధునిక సాంకేతికత కలయికను ప్రతిబింబిస్తూ చూపరులను ఆకట్టుకుంది. క్షణక్షణానికి సూర్యుడు దిగువకు జారుతుండగా ఆకాశంలోని రంగులు కూడా మారుతూ అస్తమయ దృశ్యానికి మరింత అందాన్ని చేకూర్చాయి.పచ్చని పొలాలు,నిశ్శబ్దంగా నిలిచిన చెట్లు, టవర్ రెక్కలు, ఎర్రటి సూర్యబింబం కలిసిన ఈ దృశ్యం గ్రామీణ తెలంగాణ ప్రకృతి సౌందర్యానికి అద్దం పట్టింది. ఈ అందమైన అస్తమయాన్ని పలువురు ఆసక్తిగా తిలకిస్తూ తమ సెల్‌ఫోన్లలో చిత్రాలను బంధించారు.
నేటి సూర్యాస్తమయనా సుమారు సాయంత్రం 6:01 గంటలకు నమోదైంది. సంధ్యా సమయాన ఆకాశంలో చోటుచేసుకున్న ఈ రంగుల మార్పు, అస్తమిస్తున్న సూర్యుడి కాంతులు కొద్దిసేపు పరిసర ప్రాంతాన్ని ప్రత్యేకమైన అందంతో నింపాయి.