సర్వీస్ అపార్ట్‌మెంట్లలో అసాంఘిక కార్యకలాపాలు జరిగితే కఠిన చర్యలు: మాదాపూర్ పోలీసులు హెచ్చరిక
సూర్య హైదరాబాద్ డెస్క్: బర్త్‌డే పార్టీల పేరుతో కొన్ని సర్వీస్ అపార్ట్‌మెంట్లను అద్దెకు తీసుకుని జూదం వంటి చట్టవిరుద్ధ కార్యకలాపాలకు పాల్పడుతున్న ఘటనలు పోలీసుల దాడుల్లో వెలుగుచూశాయని మాదాపూర్ ఇన్‌స్పెక్టర్ కేవీ సుబ్బారావు హెచ్చరించారు. అపార్ట్‌మెంట్లను అద్దెకు తీసుకుంటున్నవారు ఎవరూ? ఎంతమంది వస్తున్నారు? ఏ ఉద్దేశంతో వస్తున్నారనే పూర్తి వివరాలు తెలుసుకోకుండానే కొందరు యజమానులు, మేనేజర్లు గుడ్డిగా గదులు అద్దెకు ఇస్తున్నారని ఆయన ఆందోళన వ్యక్తం చేశారు.
ఇలాంటి నిబంధనలకు విరుద్ధంగా వ్యవహరిస్తున్న ఘటనలపై ఇప్పటికే రెండు, మూడు కేసులు నమోదు చేసి చట్టపరమైన చర్యలు ప్రారంభించినట్లు ఆయన వెల్లడించారు. అంతేకాకుండా, నిబంధనలు ఉల్లంఘిస్తున్న కొన్ని ప్రాపర్టీలను సీజ్ చేయాలని రెవెన్యూ అధికారులను కోరినట్లు తెలిపారు. సర్వీస్ అపార్ట్‌మెంట్లను ఇతరులకు అద్దెకు ఇచ్చేముందు వచ్చే వ్యక్తుల పూర్తి వివరాలు, వారి సంఖ్య, నిర్వహించే కార్యక్రమం యొక్క ఉద్దేశాన్ని యజమానులు తప్పనిసరిగా పరిశీలించాలని స్పష్టం చేశారు. సర్వీస్ అపార్ట్‌మెంట్లలో ఎలాంటి అసాంఘిక, చట్టవిరుద్ధ కార్యకలాపాలు జరిగినా యజమానులతో సహా బాధ్యులందరిపై కఠిన కేసులు నమోదు చేస్తామని హెచ్చరించారు.
