పట్టభద్రుల ఓటు నమోదుకు యువత ముందుకు రావాలి : మాజీ చైర్మన్‌ బోయపల్లి కొండల్‌రెడ్డి
ఘట్‌కేసర్‌ రూరల్, మేజర్ న్యూస్ (అక్టోబర్ 03) : పట్టభద్రుల ఎమ్మెల్సీ ఎన్నికల్లో అర్హులైన ప్రతి ఒక్కరూ ఓటు హక్కును నమోదు చేసుకుని ప్రజాస్వామ్య ప్రక్రియలో భాగస్వాములు కావాలని పోచారం మున్సిపాలిటీ మాజీ చైర్మన్‌ బోయపల్లి కొండల్‌రెడ్డి పిలుపునిచ్చారు. శనివారం విలేకరుల సమావేశంలో మాట్లాడుతూ అర్హత ఉన్నప్పటికీ ఓటర్ల జాబితాలో పేరు లేని పట్టభద్రులు నమోదు ప్రక్రియను పూర్తి చేసుకోవాలని సూచించారు. రంగారెడ్డి–హైదరాబాద్‌–మహబూబ్‌నగర్‌ పట్టభద్రుల నియోజకవర్గ పరిధిలోని యువత ఎన్నికలపై అవగాహన పెంచుకోవాలని కొండల్‌రెడ్డి అన్నారు. ఓటు హక్కు ద్వారా తమ అభిప్రాయాన్ని ప్రజాస్వామ్యబద్ధంగా వ్యక్తం చేసే అవకాశం ఉంటుందని తెలిపారు. నిబంధనల ప్రకారం సంబంధిత అర్హతలు ఉన్న వారు పట్టభద్రుల నియోజకవర్గ ఓటర్లుగా నమోదు చేసుకోవచ్చని పేర్కొన్నారు. అర్హత తేదీకి కనీసం మూడు సంవత్సరాల ముందు భారతదేశంలోని గుర్తింపు పొందిన విశ్వవిద్యాలయం నుంచి పట్టభద్రులై ఉండటంతో పాటు, సంబంధిత నియోజకవర్గంలో నివాసం ఉండాల్సిన నిబంధనలు ఉన్నాయని వివరించారు. ఇందుకోసం ఫారం–18 ద్వారా దరఖాస్తు చేసుకోవడంతో పాటు అందుబాటులో ఉన్న అధికారిక ఆన్‌లైన్‌ సేవలను వినియోగించుకోవచ్చన్నారు.
ఇప్పటికే నమోదు చేసుకున్న వారు ఓటర్ల జాబితాలో తమ పేరు ఉందో లేదో పరిశీలించుకోవాలని, పేరు లేకపోతే సంబంధిత ఎన్నికల అధికారుల సూచనల మేరకు నమోదు చేసుకోవాలని కొండల్‌రెడ్డి కోరారు. ముఖ్యంగా ఇటీవల పట్టభద్రులైన యువత ఓటు నమోదు ప్రక్రియపై అవగాహన పెంచుకుని తమ ఓటు హక్కును సద్వినియోగం చేసుకోవాలని పిలుపునిచ్చారు.
రిపోర్టర్ రాజు.
