నిఘా వ్యవస్థకు గ్రహణం.!

రాజేంద్రనగర్    జీహెచ్‌ఎంసీ అధికారుల నిర్లక్ష్య వైఖరి.?

గండిపేట్, మేజర్ న్యూస్  (సెప్టెంబర్ 24) :
కార్యాలయానికి వచ్చే ప్రజల ప్రతి కదలికను గమనించేందుకు ఏర్పాటు చేసిన సీసీ కెమెరాలే ఇప్పుడు ప్రశ్నార్థకంగా మారాయి. కిస్మత్‌పూర్‌లోని రాజేంద్రనగర్ జీహెచ్‌ఎంసీ సర్కిల్ కార్యాలయంలో ఏర్పాటు చేసిన నిఘా కెమెరాల పనితీరుపై ప్రజల్లో అనుమానాలు వ్యక్తమవుతున్నాయి. భద్రత కోసం లక్షల రూపాయలు వెచ్చించి కెమెరాలు ఏర్పాటు చేసినా వాటి నిర్వహణ, పనితీరుపై అధికారులు నిరంతరం పర్యవేక్షిస్తున్నారా అన్న సందేహాలు తలెత్తుతున్నాయి.

ప్రజలు నిత్యం వివిధ పనుల కోసం కార్యాలయానికి వస్తుంటారు. ఇలాంటి చోట నిఘా వ్యవస్థ పటిష్టంగా ఉండాల్సిన అవసరం ఉన్నప్పటికీ, కెమెరాల పరిస్థితిపై అధికారులు దృష్టి సారించకపోవడం విమర్శలకు దారితీస్తోంది. కెమెరాలు పనిచేయకపోతే వాటిని ఏర్పాటు చేయడం వల్ల ప్రయోజనం ఏమిటని ప్రజలు ప్రశ్నిస్తున్నారు.

ఏదైనా అవాంఛనీయ ఘటన జరిగిన తర్వాత హడావుడి చేసే పరిస్థితి కాకుండా, ముందుగానే నిఘా వ్యవస్థను తనిఖీ చేసి లోపాలను సరిచేయాలని ప్రజలు కోరుతున్నారు. కార్యాలయంలోని అన్ని సీసీ కెమెరాలు పనిచేస్తున్నాయా? రికార్డింగ్ జరుగుతోందా? ఫుటేజీ భద్రంగా ఉందా? అనే అంశాలపై అధికారులు స్పష్టత ఇవ్వాలని డిమాండ్ చేస్తున్నారు.

ఇప్పటికైనా రాజేంద్రనగర్ సర్కిల్ జీహెచ్‌ఎంసీ అధికారులు నిద్రమత్తు వీడి సీసీ కెమెరాల పనితీరును పరిశీలించి, లోపాలుంటే తక్షణమే సరిచేయాలని ప్రజలు కోరుతున్నారు. ప్రజాధనంతో ఏర్పాటు చేసిన నిఘా వ్యవస్థను నిర్లక్ష్యానికి గురిచేయకుండా బాధ్యతగా నిర్వహించాల్సిన అవసరం ఉందని అంటున్నారు.

రిపోర్టర్ : అంకం గోపాల్.