భారీ వర్షాలపై విశాఖ కలెక్టర్ సమీక్ష: అధికారులకు హైఅలర్ట్, తక్షణమే నష్టం అంచనాకు ఆదేశాలు

విశాఖపట్నం:విశాఖపట్నం జిల్లాలో గత కొన్ని రోజులుగా పడుతున్న భారీ వర్షాల తీవ్రతపై జిల్లా కలెక్టర్ అధికారులతో అత్యవసర సమీక్షా సమావేశం నిర్వహించారు. ఈ సందర్భంగా ఆయన మాట్లాడుతూ, జిల్లాలో గత మూడు రోజులుగా ఏకంగా 30 సెంటీమీటర్ల వర్షపాతం నమోదైందని, ముఖ్యంగా నిన్న సాయంత్రం నుంచే 20 సెంటీమీటర్ల మేర భారీ వర్షం కురిసిందని తెలిపారు. రాగల మరో రెండు రోజుల పాటు జిల్లాలో వర్షాలు కురిసే అవకాశం ఉందన్న వాతావరణ శాఖ హెచ్చరికల నేపథ్యంలో అధికారులంతా పూర్తి స్థాయిలో సన్నాహకంగా ఉండాలని స్పష్టం చేశారు.

పరిస్థితి తీవ్రత దృష్ట్యా అధికారులందరూ క్షేత్రస్థాయిలోనే అందుబాటులో ఉండి ప్రజలకు ఎలాంటి ఇబ్బందులు కలగకుండా సహాయక చర్యలు వేగవంతం చేయాలని ఆదేశించారు. వర్షాల వల్ల ఎక్కడైనా ఆస్తి, ప్రాణ లేదా పంట నష్టం సంభవించి ఉంటే వెంటనే క్షేత్రస్థాయి పరిశీలన జరిపి నష్టాన్ని అంచనా వేయాలని యంత్రాంగాన్ని ఆదేశించారు. లోతట్టు, ముంపు ప్రాంతాల ప్రజలను అప్రమత్తంగా ఉంచాలని, అత్యవసర పరిస్థితులు ఎదురైతే తక్షణ సహాయం అందించేందుకు శాఖల వారీగా ప్రత్యేక బృందాలు సిద్ధంగా ఉండాలని కలెక్టర్ తేల్చి చెప్పారు.