అనంతపురాన్ని కరువు జిల్లాగా ప్రకటించాలి

అనంతపురం బ్యూరో

అనంతపురాన్ని కరువు జిల్లాగా ప్రకటించాలి

కలెక్టరేట్ ఎదుట ప్రజా సంఘాల ధర్నా

 వర్షాభావం, ఎల్‌నినో ప్రభావం, తీవ్ర ఉష్ణోగ్రతలతో పంటలు నష్టపోయిన రైతాంగాన్ని ప్రభుత్వం తక్షణమే ఆదుకోవాలని డిమాండ్ చేస్తూ సీపీఐ(ఎంఎల్) లిబరేషన్, ఐఎఫ్‌టీయూ, రాయలసీమ విద్యావంతుల వేదిక, ఎస్సీ–ఎస్టీ జేఏసీ ఆధ్వర్యంలో గురువారం అనంతపురం కలెక్టరేట్ ఎదుట ధర్నా నిర్వహించారు.

సంగమేశ్ సర్కిల్ నుంచి ర్యాలీగా కలెక్టరేట్‌కు చేరుకున్న నాయకులు అనంతపురం జిల్లాను వెంటనే కరువు జిల్లాగా ప్రకటించి ప్రత్యేక ప్యాకేజీ అందించాలని డిమాండ్ చేశారు. పంట నష్టాన్ని సమగ్రంగా అంచనా వేసి రైతులకు పరిహారం, ఇన్‌పుట్ సబ్సిడీ ఇవ్వాలని, హార్టికల్చర్ రైతులకు ఎకరాకు రూ.50 వేలు, ఇతర పంటలకు రూ.30 వేల పరిహారం చెల్లించాలని కోరారు.

ఉపాధి హామీ పనిదినాలను 200 రోజులకు పెంచి, రోజువారీ కూలీని రూ.500కు పెంచాలని నాయకులు డిమాండ్ చేశారు. పెనకచెర్ల, పీఏబీఆర్ డ్యామ్‌లకు నీటిని విడుదల చేసి ఆయకట్టు పంటలకు సాగునీరు అందించాలని కోరారు. సోలార్, విండ్ ప్రాజెక్టుల పేరుతో రైతుల భూములపై ఒత్తిడి తేవడం నిలిపివేసి, రైతుల భూములు, హక్కులకు రక్షణ కల్పించాలని డిమాండ్ చేశారు.

ప్రభుత్వం వెంటనే స్పందించి కరువు సహాయక చర్యలు చేపట్టకపోతే రైతులు, వ్యవసాయ కూలీలు, ప్రజా సంఘాలతో కలిసి ఉద్యమాన్ని మరింత విస్తృతం చేస్తామని నాయకులు హెచ్చరించారు. ఈ కార్యక్రమంలో బి.సురేష్, వేమన, వెంకటేష్, సాకే హరి, దావీద్ తదితరులు పాల్గొన్నారు.