స్కూల్ బస్సు ప్రమాదంపై కఠిన చర్యలు తీసుకోవాలి

స్కూల్ బస్సు ప్రమాదంపై కఠిన చర్యలు తీసుకోవాలి

డీటీసీకి పీఎస్‌ఎఫ్ వినతి

అనంతపురం: బుక్కరాయసముద్రం మండలం సిద్ధరాంపురం సమీపంలో అనంతలక్ష్మి విద్యా సంస్థలకు చెందిన స్కూల్ బస్సు బోల్తా పడిన ఘటనపై సమగ్ర విచారణ జరిపి బాధ్యులపై కఠిన చర్యలు తీసుకోవాలని ప్రోగ్రెస్ స్టూడెంట్స్ ఫెడరేషన్ (పీఎస్‌ఎఫ్) డిమాండ్ చేసింది.

ఈ మేరకు పీఎస్‌ఎఫ్ జిల్లా ప్రధాన కార్యదర్శి ప్రతిభా భారతి ఆధ్వర్యంలో రవాణా శాఖ డీటీసీకి వినతిపత్రం అందజేశారు. బస్సులో సుమారు 30 మంది విద్యార్థులు ఉండగా, ఆటోను ఓవర్‌టేక్ చేసే సమయంలో బస్సు అదుపుతప్పి ప్రమాదానికి గురైందని, ఒక విద్యార్థికి తీవ్ర గాయాలయ్యాయని తెలిపారు.

డ్రైవర్ నిర్లక్ష్యం కారణంగానే ప్రమాదం జరిగిందని ఆరోపిస్తూ, డ్రైవర్‌పై చట్టపరమైన చర్యలు తీసుకోవాలని కోరారు. అనంతలక్ష్మి విద్యా సంస్థలతో పాటు జిల్లాలోని అన్ని పాఠశాలల బస్సుల ఫిట్‌నెస్‌ను సమగ్రంగా తనిఖీ చేయాలని, నిబంధనలు పాటించని వాహనాలపై కఠిన చర్యలు తీసుకోవాలని డిమాండ్ చేశారు.

ఈ కార్యక్రమంలో పీఎస్‌ఎఫ్ జిల్లా సహాయ కార్యదర్శి సాహిత్ తదితరులు పాల్గొన్నారు.