ఎల్-నినో ప్రభావాన్ని దృష్టిలో ఉంచుకుని పంటల ఎంపిక చేసుకోవాలి – జిల్లా ఉద్యాన అధికారి సత్తార్

కొడంగల్, మేజర్ న్యూస్: కొడంగల్ నియోజకవర్గంలో రైతులకు ఉద్యాన పంటల సాగుపై అవగాహన కల్పించేందుకు ఉద్యాన శాఖ ఆధ్వర్యంలో గ్రామాల వారీగా కార్యక్రమాలు నిర్వహిస్తున్నారు. ఇందులో భాగంగా శనివారం బొంరాస్‌పేట మండలం మెట్లకుంట గ్రామంలో ఆయిల్ పామ్ సాగుపై రైతులకు అవగాహన సదస్సు నిర్వహించారు. ఈ కార్యక్రమానికి వికారాబాద్ జిల్లా ఉద్యాన, పట్టు పరిశ్రమ శాఖ అధికారి ఎం.ఏ. సత్తార్, కొడంగల్ డివిజన్ సహాయ ఉద్యాన సంచాలకులు చంద్రశేఖర్, ఆయిల్ పామ్ సాంకేతిక సలహాదారు డాక్టర్ వై.ఎస్. రంగనాయకులు హాజరయ్యారు. ఈ సందర్భంగా సత్తార్ మాట్లాడుతూ… ఎల్-నినో ప్రభావంతో వర్షాభావ పరిస్థితులు, భూగర్భ జలమట్టాల తగ్గుదల నేపథ్యంలో రైతులు నీటి లభ్యత, వాతావరణ పరిస్థితులకు అనుగుణంగా పంటలను ఎంపిక చేసుకోవాలని సూచించారు. సంప్రదాయ పంటల సాగులో నష్టాలను తగ్గించుకుని, దీర్ఘకాలిక ఆదాయం పొందేందుకు ఉద్యాన పంటల సాగుపై దృష్టి సారించాలని కోరారు. అనంతరం డాక్టర్ రంగనాయకులు ఆయిల్ పామ్ సాగు విధానం, అనువైన నేలలు, మొక్కల మధ్య దూరం, ఎరువులు, నీటి యాజమాన్యం, అంతర పంటలు, దిగుబడులు, తీసుకోవాల్సిన జాగ్రత్తలపై రైతులకు వివరించారు. శాస్త్రీయ పద్ధతుల్లో ఆయిల్ పామ్ సాగు చేస్తే 25 నుంచి 30 ఏళ్ల వరకు ఆదాయం పొందే అవకాశం ఉందని తెలిపారు. రైతులు అడిగిన ప్రశ్నలకు సమాధానాలు ఇచ్చి సందేహాలను నివృత్తి చేశారు. ఉద్యాన శాఖ ద్వారా అమలవుతున్న పథకాలు, రాయితీల వివరాలను అధికారులు తెలియజేశారు. ఆయిల్ పామ్ మొక్కలపై 90 శాతం సబ్సిడీ, డ్రిప్ ఇరిగేషన్‌పై 70 నుంచి 90 శాతం రాయితీ, నాలుగేళ్ల వరకు ఎకరానికి రూ.4,200 నిర్వహణ ఖర్చుల సహాయం అందిస్తున్నట్లు వివరించారు. వెదురు సాగుకు ఉచిత మొక్కల పంపిణీతో పాటు ఒక్కో మొక్కకు రూ.50 నిర్వహణ సహాయం, స్ప్రింక్లర్లపై 65 శాతం సబ్సిడీ, కూరగాయల పందిళ్లకు ఎకరానికి రూ.లక్ష వరకు రాయితీ, కూరగాయల సాగుకు ఉచిత నారు పంపిణీ వంటి పథకాల గురించి వివరించారు. రైతులు ప్రభుత్వ పథకాలను సద్వినియోగం చేసుకుని వ్యవసాయాన్ని లాభసాటిగా మార్చుకోవాలని సూచించారు. ఈ కార్యక్రమంలో ఉద్యాన అధికారి సురేంద్రనాథ్, ఉద్యాన శాఖ విస్తరణ అధికారులు, ఆయిల్ పామ్ ఫీల్డ్ ఆఫీసర్లు, మెట్లకుంట సర్పంచ్ ఉమాదేవి నర్సిములు, లోతుకుంట సర్పంచ్ శాంతాబాయి నార్యా నాయక్, బొంరాస్‌పేట సర్పంచ్ వీరేశలింగం, గ్రామ కార్యదర్శులు, రైతులు పాల్గొన్నారు.