దేశం గర్వించదగిన జాతిరత్నం మన్మోహన్ సింగ్: సీఎం రేవంత్రెడ్డి
హైదరాబాద్, సూర్య ప్రతినిధి : దివంగత మాజీ ప్రధాని డాక్టర్ మన్మోహన్ సింగ్ దేశ ఆర్థిక వ్యవస్థకు అందించిన సేవలను తెలంగాణ ముఖ్యమంత్రి రేవంత్రెడ్డి కొనియాడారు. దేశం గర్వించదగిన జాతిరత్నంగా మన్మోహన్ సింగ్ నిలిచారని పేర్కొన్నారు.
మన్మోహన్ సింగ్ తీసుకొచ్చిన ఆర్థిక సంస్కరణలు ఎంతో కీలకమైనవని రేవంత్రెడ్డి అన్నారు. ఆర్థిక రంగంలో సరళీకృత విధానాలను ప్రవేశపెట్టి దేశ ఆర్థిక వ్యవస్థకు కొత్త దిశ చూపించారని తెలిపారు. అప్పటి ప్రధానమంత్రి పీవీ నరసింహారావు నేతృత్వంలో మన్మోహన్ సింగ్ తీసుకున్న ఆర్థిక విధానాలు దేశాన్ని ఆర్థిక సంక్షోభం నుంచి గట్టెక్కించడంలో కీలకపాత్ర పోషించాయని చెప్పారు.
పీవీ నరసింహారావు, మన్మోహన్ సింగ్ అమలు చేసిన ఆర్థిక విధానాల ప్రభావంతోనే భారత ఆర్థిక వ్యవస్థ బలోపేతమైందని రేవంత్రెడ్డి పేర్కొన్నారు.
తెలంగాణ బిల్లుపై సంతకం చారిత్రాత్మకం
తెలంగాణ రాష్ట్ర ఏర్పాటు ప్రక్రియలో మన్మోహన్ సింగ్ పోషించిన పాత్రను కూడా సీఎం రేవంత్రెడ్డి ప్రస్తావించారు. తెలంగాణ రాష్ట్ర ఏర్పాటుకు సంబంధించిన బిల్లుపై మన్మోహన్ సింగ్ చేసిన సంతకం సువర్ణాక్షరాలతో లిఖించదగినదని అన్నారు.
తెలంగాణ బిల్లుపై మన్మోహన్ సింగ్ చేసిన సంతకాన్నే ఇక్కడ నిక్షిప్తం చేశామని రేవంత్రెడ్డి తెలిపారు. తెలంగాణ రాష్ట్ర సాధన చరిత్రలో ఆ సంతకానికి ప్రత్యేక ప్రాధాన్యం ఉందని పేర్కొన్నారు.
