బ్యాంకు ఉద్యోగుల సమ్మె వాయిదా.. శుభవార్త చెప్పిన UFBU
సూర్య బిజినెస్ డెస్క్: దేశవ్యాప్తంగా బ్యాంకింగ్ రంగంలో తీవ్ర చర్చనీయాంశమైన బ్యాంకు ఉద్యోగుల సమ్మె తాత్కాలికంగా వాయిదా పడింది. సెప్టెంబర్ 28 నుంచి 30 వరకు మూడు రోజుల పాటు తలపెట్టిన సమ్మెను నిలిపివేస్తున్నట్లు యునైటెడ్ ఫోరమ్స్ ఆఫ్ బ్యాంక్ యూనియన్ అధికారికంగా ప్రకటించింది. దీనివల్ల రాబోయే రోజుల్లో బ్యాంకు లావాదేవీలకు ఎలాంటి అంతరాయం కలగకుండా యథావిధిగా సేవలు కొనసాగనున్నాయి.
ఇండియన్ బ్యాంక్స్ అసోసియేషన్తో జరిగిన కీలక చర్చలు ఫలించడంతో ఈ నిర్ణయం తీసుకున్నట్లు యూనియన్ వర్గాలు వెల్లడించాయి. ఆదివారం జరిగిన సమావేశంలో ఇరువర్గాల మధ్య పలు అంశాలపై సానుకూల వాతావరణంలో చర్చలు జరిగాయి. ముఖ్యంగా ఉద్యోగులు డిమాండ్ చేస్తున్న ప్రతి శనివారం సెలవు దినంగా ప్రకటించాలనే అంశంపై ఉన్నత స్థాయి కమిటీని ఏర్పాటు చేసేందుకు అంగీకారం కుదిరింది.
ఈ కమిటీ తీసుకునే నిర్ణయాల ఆధారంగానే తదుపరి కార్యాచరణ ఉంటుందని బ్యాంక్ ఎంప్లాయీస్ యూనియన్స్ స్పష్టం చేశాయి. సమస్యల పరిష్కారం కోసం చర్చల మార్గం మెరుగైన ఫలితాలనిచ్చిందని, ప్రభుత్వ మరియు యాజమాన్య స్పందనను బట్టి భవిష్యత్ నిర్ణయాలు ఉంటాయని తెలిపారు. సమ్మె విరమణ ప్రకటనతో ఖాతాదారులు, వ్యాపార వర్గాలు ఊరట చెందాయి.
