telanagana
భూ వివాదాలకు శాశ్వత పరిష్కారం.. రీ-సర్వేతో రైతులకు భరోసా:బషీరాబాద్ తహసీల్దార్ షాహిదా బేగం
బషీరాబాద్, మేజర్ న్యూస్:రాష్ట్ర ప్రభుత్వం ప్రతిష్టాత్మకంగా చేపడుతున్న భూముల రీ-సర్వే కార్యక్రమంతో దీర్ఘకాలిక భూ వివాదాలకు పరిష్కారం లభించే అవకాశం ఉందని బషీరాబాద్ తహసీల్దార్ షాహిదా బేగం అన్నారు. భూముల హద్దులను కచ్చితంగా గుర్తించి, రైతులకు భూ భద్రత కల్పించడమే రీ-సర్వే ప్రధాన లక్ష్యమని పేర్కొన్నారు.బషీరాబాద్ మండలం కుప్పన్‌కోడ్ గ్రామపంచాయతీ ఆవరణలో సర్పంచ్ రామ్‌శెట్టి అధ్యక్షతన శుక్రవారం నిర్వహించిన రీ-సర్వే గ్రామసభకు ఆమె ముఖ్య అతిథిగా హాజరై మాట్లాడారు. ప్రభుత్వం అత్యాధునిక సాంకేతిక పరిజ్ఞానాన్ని వినియోగించి రీ-సర్వే చేపడుతోందని తెలిపారు. డ్రోన్లు, రోవర్ పరికరాల సహాయంతో భూములను సర్వే చేసి, ప్రతి ఎకరానికి సంబంధించిన హద్దులను కచ్చితంగా నిర్ధారించేందుకు చర్యలు తీసుకుంటున్నట్లు వివరించారు.రీ-సర్వే ప్రక్రియ సజావుగా సాగేందుకు రైతులు అధికారులకు పూర్తి సహకారం అందించాలని తహసీల్దార్ సూచించారు. సర్వే సమయంలో రైతులు తమ పట్టాదార్ పాస్ పుస్తకాలు, ఆధార్ కార్డులతో పొలాల వద్ద అందుబాటులో ఉండాలని కోరారు. తమ భూముల హద్దులను స్పష్టంగా చూపించి, సర్వేకు అవసరమైన వివరాలను అధికారులకు అందించాలని సూచించారు. ప్రభుత్వం కల్పిస్తున్న ఈ అవకాశాన్ని రైతులు సద్వినియోగం చేసుకొని భవిష్యత్తులో భూ వివాదాలు తలెత్తకుండా సహకరించాలని ఆమె విజ్ఞప్తి చేశారు.ఈ కార్యక్రమంలో రెవెన్యూ ఇన్‌స్పెక్టర్ నాగార్జున రెడ్డి, సర్వేయర్, జీపీఏలు, ప్రజాప్రతినిధులు, స్థానిక రైతులు పెద్ద సంఖ్యలో పాల్గొన్నారు.
