భవిష్యత్ అవసరాల దూరదృష్టితోనే కొత్త రహదారుల నిర్మాణం మంత్రి కోమటి రెడ్డి వెంకట్ రెడ్డి

కేంద్ర–రాష్ట్ర ప్రభుత్వాల సమన్వయంతోనే అభివృద్ధి సాధ్యం
ఎక్తానగర్ చేరుకున్న మంత్రికి గుజరాత్  సాంప్రదాయం ప్రకారం ఘన స్వాగతం

తెలంగాణ బ్యూరో, ప్రతినిధి:
చింతన్ శివిర్‌- 2026 కు హాజరయ్యేందుకు గుజరాత్ చేరుకున్న సందర్భంగా మంత్రి కోమటిరెడ్డి వెంకట్‌రెడ్డి స్థానిక మీడియాతో మాట్లాడుతూ దేశంలో రహదారుల అభివృద్ధికి కేంద్రమంత్రి నితిన్ గడ్కరీ ప్రత్యేక శ్రద్ధ తీసుకుంటున్నారని అన్నారు. భవిష్యత్ అవసరాల దూరదృష్టితోనే జాతీయ రహదారుల నిర్మాణం వేగంగా జరుగుతోందని చెప్పారు. హామ్  ప్రాజెక్టులు కూడా దేశవ్యాప్తంగా రహదారుల అభివృద్ధిలో కీలకంగా మారాయని మంత్రి పేర్కొన్నారు. గడ్కరీ నాయకత్వంలో రహదారుల రంగంలో పర్వతమాల, రోప్‌వేలు వంటి అనేక కొత్త కార్యక్రమాలు ముందుకు వస్తున్నాయని, వాటి ద్వారా దేశంలోని మౌలిక వసతులు మరింత బలోపేతం అవుతున్నాయని తెలిపారు.మీడియా ప్రతినిధులు అడిగిన ప్రశ్నకు మంత్రి సమాధానం ఇస్తూ
రాజకీయాలకు అతీతంగా కేంద్రమంత్రి నితిన్ గడ్కరీ రాష్ట్రాల అభివృద్ధికి సహకరిస్తున్నారని మంత్రి కోమటిరెడ్డి వెంకట్‌రెడ్డి ప్రశంసించారు. కాంగ్రెస్, బీజేపీ లేదా ప్రాంతీయ పార్టీ ఏ ప్రభుత్వం ఉన్నా అన్ని రాష్ట్రాలను సమానంగా చూస్తూ, అభివృద్ధి పనులకు ప్రాధాన్యత ఇస్తున్నారని చెప్పారు. తాము కేంద్రాన్ని కోరిన పలు రహదారి ప్రాజెక్టులను కూడా ఆయన సానుకూలంగా పరిశీలించి మంజూరు చేస్తున్నారని మంత్రి తెలిపారు. అందుకే దేశవ్యాప్తంగా రహదారుల అభివృద్ధి వేగంగా సాగుతోందని అన్నారు. దేశంలో భారీ మౌలిక వసతుల ప్రాజెక్టులు విజయవంతంగా పూర్తి కావాలంటే కేంద్ర, రాష్ట్ర ప్రభుత్వాల మధ్య సమన్వయం అత్యంత కీలకమని, చింతన్ శివిర్ ప్రధాన ఉద్దేశమని మంత్రి పేర్కొన్నారు. రాష్ట్ర అవసరాలను కేంద్రం దృష్టికి తీసుకెళ్లడంతో పాటు, కేంద్రం చేపడుతున్న కొత్త విధానాలు, పథకాలను రాష్ట్రంలో సమర్థవంతంగా అమలు చేయడానికి ఈ సమావేశం ఉపయోగపడుతుందని తెలిపారు.
తెలంగాణ భవిష్యత్ అవసరాలకు అనుగుణంగా రహదారి మౌలిక వసతులను అభివృద్ధి చేయడమే ప్రజా ప్రభుత్వ లక్ష్యమని, ఇందుకోసం కేంద్రంతో సమన్వయం చేసుకుంటూ రాష్ట్రానికి అవసరమైన అన్ని కీలక ప్రాజెక్టులను సాధించేందుకు కృషి చేస్తామని మంత్రి కోమటిరెడ్డి వెంకట్‌రెడ్డి స్పష్టం చేశారు.