హైదరాబాద్ /ఆల్వాల్, మేజర్ న్యూస్ : అల్వాల్ యూత్ ప్రేయర్ ఫెలోషిప్ ఆధ్వర్యంలోగురువారం బొల్లారంలోని జీసీసీ గ్రౌండ్‌లో నిర్వహించిన అల్వాల్ ప్రీమియర్ లీగ్ (ఎపిఎల్ ) – 2026, ఏడవ సీజన్ కార్యక్రమానికి మల్కాజ్‌గిరి ఎమ్మెల్యే మర్రి రాజశేఖర్ రెడ్డి ముఖ్య అతిథిగా హాజరయ్యారు. ఈ సందర్భంగా లీగ్‌లో ప్రతిభ కనబరిచి విజయం సాధించిన క్రీడాకారులకు, జట్లకు బహుమతులు ప్రదానం చేసి అభినందించారు.ఈ సందర్భంగా ఎమ్మెల్యే మాట్లాడుతూ, యువత శారీరకంగా, మానసికంగా దృఢంగా ఎదగడానికి క్రీడలు ఎంతగానో దోహదపడతాయని పేర్కొన్నారు. క్రీడల ద్వారా క్రమశిక్షణ, పట్టుదల, నాయకత్వ లక్షణాలు, జట్టుగా పనిచేసే సామర్థ్యం పెంపొందుతాయని తెలిపారు. గెలుపోటములను సమానంగా స్వీకరిస్తూ, క్రీడాస్ఫూర్తితో ముందుకు సాగాలని యువ క్రీడాకారులకు సూచించారు.
స్థానిక యువతలో క్రీడల పట్ల ఆసక్తిని పెంపొందిస్తూ, క్రీడాకారులు తమ ప్రతిభను ప్రదర్శించేందుకు వేదిక కల్పిస్తున్న అల్వాల్ యూత్ ప్రేయర్ ఫెలోషిప్ నిర్వాహకులను ఎమ్మెల్యే అభినందించారు. ఇలాంటి క్రీడా పోటీలు యువతలో ఆరోగ్యకరమైన పోటీ తత్వాన్ని పెంపొందించడంతో పాటు, స్నేహభావం, ఐక్యత, పరస్పర సహకారాన్ని బలోపేతం చేస్తాయని పేర్కొన్నారు. భవిష్యత్తులోనూ మరిన్ని క్రీడా కార్యక్రమాలు నిర్వహించి యువతను ప్రోత్సహించాలని ఆకాంక్షించారు.
అల్వాల్ ప్రీమియర్ లీగ్ ఏడవ సీజన్‌లో క్రీడాకారులు ఉత్సాహంగా పాల్గొనగా, విజేతలకు బహుమతుల ప్రదానం కార్యక్రమానికి మరింత ప్రత్యేకతను తీసుకొచ్చింది.
ఈ కార్యక్రమంలో నిర్వాహకులు ఫ్రాంక్లిన్, లియోనార్డ్, దినకర్, సామ్యూల్, ఆనంద్, బీఆర్ఎస్ నాయకులు తోట నరేందర్ రెడ్డి, అరుణ్ రావు, భాస్కర్ రెడ్డి, శోభన్ బాబు, మహేష్, శరణ గిరి, ప్రశాంత్, అరుణ్, అజయ్ గౌడ్, మణికంఠ, క్రీడాకారులు, యువత తదితరులు పాల్గొన్నారు.
