కేంద్ర మంత్రి శివరాజ్ సింగ్ చౌహాన్ నేడు పంజాబ్ పర్యటన
‘నషా ముక్త్ పంజాబ్ యాత్ర’ ప్రారంభం
బటిండా: కేంద్ర వ్యవసాయ మరియు రైతు సంక్షేమ శాఖ మంత్రి శివరాజ్ సింగ్ చౌహాన్ సోమవారం పంజాబ్లో ఒక రోజు పర్యటన చేపట్టనున్నారు. ఈ పర్యటనలో భాగంగా ఆయన ‘నషా ముక్త్ పంజాబ్ యాత్ర’ను (మత్తుపదార్థాల రహిత పంజాబ్ యాత్ర) ప్రారంభించడంతో పాటు బహిరంగ సభలో ప్రసంగించనున్నారు. అలాగే స్థానిక రైతులు, స్వయం సహాయక సంఘాల (SHG) మహిళలతో క్షేత్రస్థాయిలో ముఖాముఖి సమావేశం కానున్నారు.
పర్యటన షెడ్యూల్ ప్రకారం.. బటిండా జిల్లాలోని పవిత్ర పుణ్యక్షేత్రం తఖ్త్ శ్రీ దమ్దమా సాహిబ్ను సందర్శించి ప్రత్యేక ప్రార్థనలు చేయడం ద్వారా కేంద్ర మంత్రి తన పర్యటనను ప్రారంభిస్తారు. అనంతరం రవిదాసియా చౌక్ వద్ద ‘నషా ముక్త్ పంజాబ్ యాత్ర’ను ప్రారంభించి, మాదకద్రవ్యాల వ్యతిరేక అవగాహన ర్యాలీలో పాల్గొంటారు. ఆ తర్వాత మైసర్ ఖానాలో ఏర్పాటు చేసిన భారీ బహిరంగ సభను ఉద్దేశించి ప్రసంగిస్తారు.
మధ్యాహ్నం గురుద్వారా తిట్టార్సర్ సాహిబ్ను సందర్శించి సామూహిక లంగర్ (ప్రసాద వితరణ) కార్యక్రమంలో పాల్గొంటారు. పర్యటన ముగింపులో బటిండాలోని కృషి విజ్ఞాన కేంద్రాన్ని (KVK) సందర్శించి రైతులు, ఎస్హెచ్జీ మహిళలతో మాట్లాడనున్నారు. రాష్ట్రంలో గ్రామీణ జీవనోపాధి, వ్యవసాయ పథకాల అమలు తీరును ఆయన పరిశీలిస్తారు. కాగా, ఈ రాష్ట్రవ్యాప్త ‘నషా ముక్త్ పంజాబ్ యాత్ర’ను సెప్టెంబర్ 18న పఠాన్కోట్లో బీజేపీ జాతీయ అధ్యక్షుడు నితిన్ నబిన్ అధికారికంగా ప్రారంభించిన సంగతి తెలిసిందే.
