తిస్తా నది ప్రవాహంలో చిక్కుకున్న ఏనుగు పిల్ల.. ప్రాణాలు కాపాడిన మత్స్యకారులు!

సూర్య వైరల్ డెస్క్: పశ్చిమ బెంగాల్‌లో చోటుచేసుకున్న ఒక హృదయస్పర్శి ఘటన ప్రస్తుతం సోషల్ మీడియాలో వైరల్‌గా మారింది. ఉప్పొంగి ప్రవహిస్తున్న తిస్తా నదిలో కొట్టుకుపోతున్న ఒక ఏనుగు పిల్లను ఇద్దరు సాహసోపేత మత్స్యకారులు ప్రాణాలకు తెగించి రక్షించారు. నదిలో ప్రమాదకరంగా కొట్టుకొస్తున్న ఏనుగు పిల్లను గమనించిన ఆ మత్స్యకారులు వెంటనే అప్రమత్తమై తమ పడవలోకి ఎక్కించుకున్నారు. సురక్షితంగా ఒడ్డుకు చేర్చిన అనంతరం, అటవీ శాఖ అధికారుల సహకారంతో ఆ ఏనుగు పిల్లను దాని తల్లి వద్దకు చేర్చి మానవత్వాన్ని చాటుకున్నారు.

ఈ ఘటనకు సంబంధించిన పూర్తి వివరాల్లోకి వెళితే.. పశ్చిమ బెంగాల్‌లోని జల్పాయిగురి ప్రాంతంలో గజల్‌డోబా సమీపంలోని తిస్తా నదిలో ఒక ఏనుగుల గుంపు నదిని దాటే ప్రయత్నం చేసింది. అయితే ఉగ్రరూపం దాల్చిన నది ఉధృతికి సుమారు రెండు వారాల వయసున్న ఒక ఏనుగు పిల్ల తన గుంపు నుంచి వేరుపడి సుమారు 4 కిలోమీటర్ల దూరం వరకూ నీటిలో కొట్టుకుపోయింది. ఊపిరి ఆడక, నీటితో పోరాడుతూ తొండాన్ని మాత్రం బయటపెట్టి ప్రాణాల కోసం ఆ ఏనుగు పిల్ల పడిన పాట్లు అక్కడి వారిని కంటతడి పెట్టించాయి.

అదే సమయంలో అక్కడ చేపల వేటలో ఉన్న మత్స్యకారులు ఈ దృశ్యాన్ని గమనించారు. ఏమాత్రం ఆలోచించకుండా తమ ప్రాణాలను సైతం లెక్కచేయకుండా చిన్న పడవల్లో ఉప్పొంగిన ప్రవాహంలోకి దూకి ఆ ఏనుగు పిల్లను వెంబడించారు. తీవ్రమైన ప్రవాహాన్ని ఎదుర్కొంటూ ఎంతో కష్టపడి ఆ పసికూనను పడవలోకి చేర్చారు. అనంతరం సురక్షితంగా ఒడ్డుకు తీసుకువచ్చి అటవీ శాఖ అధికారులకు అప్పగించారు.

అధికారులు ఆ ఏనుగు పిల్లకు ప్రాథమిక వైద్య పరీక్షలు నిర్వహించి ఆరోగ్య పరిస్థితిని పరిశీలించారు. ఆ తర్వాత అటవీ సిబ్బంది, స్థానికులు మరియు మత్స్యకారులు కలిసి ప్రత్యేక వ్యూహంతో ఆ ఏనుగు పిల్లను దాని మంద ఉన్న ప్రాంతానికి తీసుకెళ్లారు. అక్కడ తల్లి ఏనుగు ఆ పిల్లను చూడగానే ప్రేమతో దగ్గరకు తీసుకొని పాలిచ్చి లాలించింది. మత్స్యకారుల సాహసం, అటవీ శాఖ అధికారుల సమన్వయం వల్ల ఒక ప్రాణం దక్కడంతో పాటు తల్లి బిడ్డలు కలవడంపై సర్వత్రా ప్రశంసలు వ్యక్తమవుతున్నాయి