ఐడీబీఐ బ్యాంక్ వాటాల విక్రయం: 2003 చట్టం, హైకోర్టు తీర్పును ప్రస్తావించిన కేంద్రం!

సూర్య వాణిజ్య & జాతీయ డెస్క్: ప్రభుత్వ రంగ ఆర్థిక సంస్థ ఐడీబీఐ బ్యాంక్‌లో వ్యూహాత్మక వాటాల ఉపసంహరణ ప్రక్రియపై తలెత్తిన వివాదాలు, ఉద్యోగ సంఘాల అభ్యంతరాలపై కేంద్ర ఆర్థిక మంత్రిత్వ శాఖ సమగ్ర వివరణతో కూడిన స్పష్టతనిచ్చింది. 2003 నాటి ఐడీబీఐ రిపీల్ చట్టం ప్రకారం ప్రభుత్వ వాటాను ఎట్టిపరిస్థితుల్లోనూ 51 శాతం కంటే తగ్గించకూడదన్న నిబంధన ఏదీ లేదని, ఈ అంశాన్ని 2018లోనే ఢిల్లీ హైకోర్టు స్పష్టంగా ధ్రువీకరించిందని కేంద్రం వెల్లడించింది. పార్లమెంట్ ఆమోదించిన శాసనంలో వాటా పరిమితిపై ఎటువంటి చట్టపరమైన ఆంక్షలు లేవని ఆర్థిక శాఖ స్పష్టం చేసింది.

పార్లమెంట్ చర్చలు – సవరణ తిరస్కరణ నేపథ్యం:
2003 కేంద్ర బడ్జెట్ చర్చల సందర్భంగా మరియు 'ఇండస్ట్రియల్ డెవలప్‌మెంట్ బ్యాంక్ (ట్రాన్స్‌ఫర్ ఆఫ్ అండర్‌టేకింగ్ అండ్ రిపీల్) యాక్ట్, 2003' ఆమోదం పొందే సమయంలో చోటుచేసుకున్న పరిణామాలను మంత్రిత్వ శాఖ ప్రస్తావించింది. అప్పట్లో ప్రభుత్వ వాటాను 51 శాతానికి తగ్గకుండా పరిమితం చేయాలంటూ ప్రతిపాదించిన సవరణను పార్లమెంట్ స్పష్టంగా తిరస్కరించిందని గుర్తుచేసింది. పార్లమెంట్ ఆమోదించిన తుది చట్టంలో ఆ సవరణ భాగం కాలేదని స్పష్టం చేసింది. చట్టంపై చర్చ సందర్భంగా పార్లమెంట్ సభ్యులు లేదా మంత్రులు చేసిన ప్రసంగాలు, ఆమోదించబడిన అధికారిక శాసనాన్ని అధిగమించలేవని లేదా భర్తీ చేయలేవని ఆర్థిక శాఖ తేల్చిచెప్పింది.

ఢిల్లీ హైకోర్టు చారిత్రక తీర్పు ప్రాతిపదిక:
వాటాల తగ్గింపు అంశంపై 'ఆల్ ఇండియా ఐడీబీఐ ఆఫీసర్స్ అసోసియేషన్ వర్సెస్ యూనియన్ ఆఫ్ ఇండియా' కేసులో 2018 డిసెంబర్ 17న ఢిల్లీ హైకోర్టు ఇచ్చిన తీర్పును కేంద్రం ప్రముఖంగా ఉటంకించింది. చట్టం ఆమోదం పొందే సమయంలో సభలో జరిగిన ప్రసంగాలు దాదాపు దశాబ్దంన్నర తర్వాత ప్రభుత్వ వాటాను తగ్గించకుండా అడ్డుకోలేవని కోర్టు స్పష్టం చేసిందని పేర్కొంది. 'ప్రామిసరీ ఎస్టోపెల్'  సూత్రం ఈ శాసన ప్రక్రియకు ఎంతమాత్రం వర్తించదని, నాటి చర్చలను ఉద్యోగులకు ఇచ్చిన చట్టబద్ధమైన హామీగా పరిగణించలేమని హైకోర్టు తేల్చిచెప్పింది. ఐడీబీఐ రిపీల్ యాక్ట్, 2003 నిబంధనలలో ఎలాంటి సందిగ్ధత లేదని, ప్రభుత్వ వాటాను తగ్గించడాన్ని లేదా ఉపసంహరించుకోవడాన్ని నిషేధించే ఎలాంటి నిబంధనా ఆ చట్టంలో లేదని న్యాయస్థానం స్పష్టమైన తీర్పునిచ్చిన విషయాన్ని గుర్తుచేసింది.

వ్యూహాత్మక ప్రైవేటీకరణ దిశగా అడుగులు:
గతంలో మాజీ ఆర్థిక మంత్రి అరుణ్ జైట్లీ, ప్రస్తుత ఆర్థిక మంత్రి నిర్మలా సీతారామన్ తమ బడ్జెట్ ప్రసంగాల్లో ఐడీబీఐ బ్యాంక్‌లో 50 శాతం కంటే తక్కువకు ప్రభుత్వ వాటాను తగ్గించే సంస్కరణలను వెల్లడించారని ఆర్థిక శాఖ తెలిపింది. ఇటీవల కేంద్ర ఆర్థిక వ్యవహారాల క్యాబినెట్ కమిటీ  ఐడీబీఐ బ్యాంక్‌లోని 60.72 శాతం వాటాను ఫెయిర్‌ఫాక్స్ ఫైనాన్షియల్ హోల్డింగ్స్ అనుబంధ సంస్థకు ₹52,878.08 కోట్లకు విక్రయించేందుకు ఆమోదం తెలిపిన నేపథ్యంలో, చట్టపరమైన అడ్డంకులు ఏవీ లేవని వివరిస్తూ ప్రభుత్వం ఈ సమగ్ర ప్రకటన విడుదల చేసింది.