రాయదుర్గం మున్సిపల్ ఎన్నికల నామినేషన్లకు పటిష్ట బందోబస్తు నలుగురు ఎస్సైలు, 35 మంది పోలీసులతో భద్రతా ఏర్పాట్లు

రాయదుర్గం (రాయదుర్గం ఇన్చార్జి రాయదుర్గం) : మున్సిపల్ ఎన్నికల నామినేషన్ల ప్రక్రియ నేపథ్యంలో రాయదుర్గం పట్టణంలో పోలీసులు పటిష్ట బందోబస్తు ఏర్పాటు చేశారు. పట్టణ అర్బన్ సీఐ దేవానంద్ ఆధ్వర్యంలో నలుగురు ఎస్సైలు, 35 మంది పోలీసు సిబ్బందితో భద్రతా చర్యలు చేపట్టారు.

నామినేషన్ల దాఖలు సందర్భంగా ఎలాంటి అవాంఛనీయ సంఘటనలు చోటుచేసుకోకుండా పోలీసులు ప్రత్యేక నిఘా ఏర్పాటు చేశారు. ఎన్నికల నిబంధనలను ప్రతి ఒక్కరూ తప్పనిసరిగా పాటించాలని అధికారులు సూచించారు. నామినేషన్ దాఖలు చేసే అభ్యర్థులు ఒక అభ్యర్థితో పాటు మరో ఇద్దరు మాత్రమే (వన్ ప్లస్ టూ విధానంలో) ఎన్నికల గదిలోకి వెళ్లాలని స్పష్టం చేశారు.

ఈ సందర్భంగా పట్టణ అర్బన్ సీఐ దేవానంద్, మున్సిపల్ కమిషనర్ దివాకర్ రెడ్డి, ఎన్నికల అధికారి సూర్యప్రతాప్ తదితరులు నామినేషన్ల ప్రక్రియను పర్యవేక్షించారు. ఎన్నికల ప్రక్రియ ప్రశాంతంగా, పారదర్శకంగా జరిగేలా అన్ని ముందస్తు చర్యలు చేపట్టినట్లు అధికారులు తెలిపారు.

రిపోర్టర్ : శివకుమార్, రాయదుర్గం ఇంచార్జ్, రాయదుర్గం.