సంతా మా ఊరి సంత దసరా పండుగ వేళ కిటకిటలాడిన మేకల సంత

తలకొండపల్లి, రంగారెడ్డి  : మండలంలోని ఎక్స్ రోడ్ సమీపంలో ప్రతి శనివారం జరిగే సంత దసరా పండుగ వేళ అత్యంత రద్దీగా మారింది. దసరా పండుగ సందర్భంగా మేకలు, పొట్టేళ్లను కొనుగోలు చేయడానికి జనం తండోపతండాలుగా సంతకు చేరుకున్నారు. వ్యాపారులు, రైతులు పెద్ద ఎత్తున మేకలను తీసుకురావడంతో సంత కిటకిటలాడింది. శనివారం తెల్లవారుజాము నుండే మేకలను, పొట్టేళ్లను, లారీలు, ఆటోలు, టాటా ఏస్ లలో తరలించి సంతకు తీసుకొచ్చారు. కొనుగోలుదారులు బేరసారాలు చేస్తూ తమకు నచ్చిన మేకలను కొనుగోలు చేశారు. చిన్న మేక రూ.8,000 నుండి రూ.12,000 వరకు, మంచి పొట్టేలు రూ.15,000 నుండి రూ.25,000 వరకు పలుకుతున్నట్లు వ్యాపారులు తెలిపారు. గత వారం కంటే ఈ వారం ధరలు రూ.2,000 నుండి రూ.3,000 పెరిగాయని చెబుతున్నారు. దసరా పండుగ కావడంతో మేకలకు మంచి ధర పలుకుతుందని వ్యాపారులు, రైతులు సంతోషం వ్యక్తం చేస్తున్నారు. ఈ సంతకు తలకొండపల్లితో పాటు హైదరాబాద్, కల్వకుర్తి, ఆమనగల్లు, కందుకూరు, మహబూబ్ నగర్ ప్రాంతాల నుండి కూడా వ్యాపారులు, కొనుగోలుదారులు వస్తున్నట్లు నిర్వాహకులు తెలిపారు.

- చెప్పిన తిరుపతి మేజర్ న్యూస్.