ఢిల్లీ వాసులకు ఊరట: 'సంతృప్తికరం' కేటగిరీలోకి ఎయిర్ క్వాలిటీ ఇండెక్స్

సూర్య నేషనల్ బ్యూరో, న్యూఢిల్లీ: దేశ రాజధాని ఢిల్లీలో వాయు కాలుష్యం నుంచి ప్రజలకు భారీ ఊరట లభించింది. గురువారం అర్ధరాత్రి నుంచి కురిసిన భారీ వర్షం కారణంగా వాతావరణం చల్లబడటంతో పాటు గాలి నాణ్యత గణనీయంగా మెరుగుపడింది. సెంట్రల్ పొల్యూషన్ కంట్రోల్ బోర్డ్ నిబంధనల ప్రకారం వాయు నాణ్యత సూచీ (AQI) 51 నుంచి 100 మధ్య ఉంటే దానిని ‘సంతృప్తికరం’  విభాగంగా పరిగణిస్తారు. వర్షం అనంతరం ఇండియా గేట్ పరిసరాల్లో AQI ఏకంగా 93 స్థాయికి పడిపోయి సంతృప్తికర కేటగిరీలోకి చేరింది.

ప్రభుత్వ చర్యలు, ప్రజా భాగస్వామ్యమే కారణం – మంజిందర్ సింగ్ సిర్సా:
ఢిల్లీలో కాలుష్యం తగ్గి గాలి నాణ్యత మెరుగుపడటంపై బీజేపీ సీనియర్ నేత మంజిందర్ సింగ్ సిర్సా స్పందించారు. ఇండియా గేట్ వద్ద 93 AQI నమోదు కావడంపై ఆయన 'ఎక్స్' (ట్విట్టర్) వేదికగా హర్షం వ్యక్తం చేశారు. కేవలం వర్షం మాత్రమే కాకుండా, ప్రభుత్వం పకడ్బందీగా చేపట్టిన కాలుష్య నివారణ చర్యలు ), ప్రజల భాగస్వామ్యం వల్లే ఈ ఫలితం సాధ్యమైందని ఆయన పేర్కొన్నారు. కాలుష్య నియంత్రణపై రౌండ్-ది-క్లాక్ పనిచేస్తున్న యంత్రాంగాన్ని, ఇందులో పాలుపంచుకుంటున్న ఢిల్లీ ప్రజలను ఆయన అభినందించారు.

నాలుగేళ్లలో రికార్డు స్థాయి అక్టోబర్ వర్షపాతం:
వాతావరణ శాఖ (IMD) వెల్లడించిన వివరాల ప్రకారం, ఢిల్లీ నగరంలో శుక్రవారం ఉదయం 8:30 గంటల వరకు గత 24 గంటల్లో ఏకంగా 61.4 మి.మీ వర్షపాతం నమోదైంది. గత నాలుగేళ్ల కాలంలో అక్టోబర్ నెలలో ఒక్క రోజులో నమోదైన అత్యధిక వర్షపాతం ఇదే కావడం విశేషం. ఈ అకాల వర్షం వాయు కాలుష్య కారకాలను తొలగించి, నగరవాసులకు స్వచ్ఛమైన గాలిని అందించడంలో కీలక పాత్ర పోషించింది.