తైవాన్ ప్రభుత్వ ఆఫీసుల్లో అగ్రరాజ్యం ఉద్యోగులు.. వాషింగ్టన్, తైపీల సంచలన ఒప్పందం!
సూర్య అంతర్జాతీయ డెస్క్: అమెరికా, తైవాన్ దేశాల మధ్య దౌత్య మరియు పరిపాలనా సంబంధాలను మరింత బలపరిచే దిశగా ఒక చారిత్రాత్మక పరిణామం చోటుచేసుకుంది. అమెరికా ఫెడరల్ ప్రభుత్వంలో వివిధ శాఖలలో పనిచేస్తున్న ఉన్నతాధికారులు, ఉద్యోగులు తైవాన్ ప్రభుత్వ కార్యాలయాల్లో నేరుగా విధులు నిర్వహించేలా ఇరు ప్రాంతాల మధ్య సరికొత్త ఫెలోషిప్ ప్రోగ్రామ్‌పై అధికారిక అవగాహన ఒప్పందం (MoU) కుదిరింది. అమెరికా ఇన్సిస్ట్యూట్ ఇన్ తైవాన్ (AIT) ద్వారా ఈ ఒప్పందాన్ని కుదుర్చుకున్నట్లు సంబంధిత అధికారిక వర్గాలు ధ్రువీకరించాయి.
ఈ ప్రత్యేక కార్యక్రమం ద్వారా ఎంపిక చేసిన అమెరికా ఫెడరల్ ఉద్యోగులు తైవాన్‌లో నివాసముంటూ అక్కడి ప్రభుత్వ పరిపాలనా విధానాలు, విధాన నిర్ణయ ప్రక్రియలు, సాంస్కృతిక వైవిధ్యం మరియు భాషా పరిజ్ఞానంపై ప్రత్యక్ష అవగాహన పెంచుకుంటారు. గతంలో 1994లో జపాన్‌తో కుదుర్చుకున్న మైక్ మాన్స్‌ఫీల్డ్ ఫెలోషిప్ తరహాలోనే ఈ తైవాన్ ఫెలోషిప్ ప్రోగ్రామ్ (TFP) ను కూడా రూపొందించినట్లు అధికారులు స్పష్టం చేశారు. అమెరికాలోని ప్రధాన రాజకీయ పార్టీల ద్వైపాక్షిక మద్దతుతో ఈ నూతన విధానాన్ని అమలులోకి తీసుకురావడం గమనార్హం.
మరోవైపు తైవాన్‌ను తమ స్వంత భూభాగంగా పేర్కొంటూ సార్వభౌమాధికారం ప్రకటించుకుంటున్న చైనాకు ఈ పరిణామం తీవ్ర అసంతృప్తిని కలిగించే అంశంగా మారింది. వాషింగ్టన్, తైపీల మధ్య పెరుగుతున్న దౌత్య, వ్యూహాత్మక సంబంధాలను బీజింగ్ నిరంతరం వ్యతిరేకిస్తూనే వస్తోంది. ఇండో-పసిఫిక్ ప్రాంతంలో భద్రత, స్థిరత్వం మరియు ద్వైపాక్షిక వ్యూహాత్మక భాగస్వామ్యాన్ని పటిష్టం చేసేందుకు అమెరికా చేపట్టిన ఈ చర్య ప్రపంచ రాజకీయాల్లో తీవ్ర చర్చకు దారితీస్తోంది.
