ప్రిన్స్ అలాయిస్‌తో కేంద్ర మంత్రి నిర్మలా సీతారామన్ భేటీ
సూర్య నేషనల్ బ్యూరో, న్యూఢిల్లీ: అధికారిక పర్యటన నిమిత్తం భారత్‌కు విచ్చేసిన యూరోపియన్ దేశం లైకెస్టీన్ తాత్కాలిక దేశాధినేత, వారసత్వ యువరాజు అలోయిస్తో కేంద్ర ఆర్థిక శాఖ మంత్రి నిర్మలా సీతారామన్ మంగళవారం దేశ రాజధాని న్యూఢిల్లీలో సమావేశమయ్యారు. ఈ ఉన్నత స్థాయి భేటీలో ఇరు దేశాల మధ్య ఆర్థిక సంబంధాల బలోపేతం, వాణిజ్య విస్తరణ, పరస్పర పెట్టుబడుల అవకాశాలపై విస్తృతంగా చర్చించారు.
ఈఎఫ్‌టీఏ ఒప్పందం నేపథ్యంలో చర్చలు:
భారత్ మరియు యూరోపియన్ ఫ్రీ ట్రేడ్ అసోసియేషన్ మధ్య కుదిరిన 'ట్రేడ్ అండ్ ఎకనామిక్ పార్ట్‌నర్‌షిప్ అగ్రిమెంట్' అమలులోకి వచ్చిన నేపథ్యంలో ఈ సమావేశం అత్యంత ప్రాధాన్యతను సంతరించుకుంది. ఈ ఒప్పందం ద్వారా భారత మార్కెట్లలోకి రానున్న 100 బిలియన్ డాలర్ల పెట్టుబడుల్లో లైకెస్టీన్ సంస్థల భాగస్వామ్యం, హైటెక్ మాన్యుఫ్యాక్చరింగ్, ఫిన్‌టెక్, మరియు సుస్థిర ఆర్థిక సేవల రంగాల్లో సహకారాన్ని పెంపొందించుకోవడంపై మంత్రి నిర్మలా సీతారామన్ యువరాజుతో సమాలోచనలు జరిపారు.
రాష్ట్రపతి భవన్‌లో ఘన స్వాగతం – ద్వైపాక్షిక సంబంధాల విస్తరణ:
న్యూఢిల్లీ పర్యటనలో భాగంగా అంతకుముందు రాష్ట్రపతి భవన్‌లో ప్రిన్స్ అలాయిస్‌కు భారత ప్రభుత్వం లాంఛనప్రాయంగా ఘన స్వాగతం పలికింది. ఆయన వెంట వచ్చిన ఉన్నత స్థాయి వ్యాపార ప్రతినిధి బృందం భారత పారిశ్రామిక వేత్తలతో కూడా చర్చలు జరిపింది. నైపుణ్యాభివృద్ధి, ఆవిష్కరణలు, ఆర్థిక సేవల పరిధిని విస్తరించడం ద్వారా భారత్-లైకెస్టీన్ సంబంధాలు సరికొత్త శిఖరాలకు చేరుకుంటాయని ఇరుపక్షాలు ఆశాభావం వ్యక్తం చేశాయి.
