రేపే 'ఆదర్శ కుటుంబం' గ్రాండ్ రిలీజ్.. 20 ఏళ్ల తర్వాత వెంకటేష్-త్రివిక్రమ్ మ్యాజిక్ రిపీట్ అయ్యేనా!

సూర్య ఎంటర్‌టైన్‌మెంట్ డెస్క్: విక్టరీ వెంకటేష్, మాటల మాంత్రికుడు త్రివిక్రమ్ శ్రీనివాస్ కలయికలో రూపుదిద్దుకున్న ప్రతిష్టాత్మక చిత్రం ‘ఆదర్శ కుటుంబం – హౌస్ నెం. 47’. హారిక అండ్ హాసిని క్రియేషన్స్ పతాకంపై ఎస్. రాధాకృష్ణ (చినబాబు) నిర్మించిన ఈ చిత్రంలో శ్రీనిధి శెట్టి కథానాయికగా నటించగా, తమన్ స్వరాలు సమకూర్చారు. నారా రోహిత్, నివేదా పేతురాజ్ కీలక పాత్రల్లో మెరిసిన ఈ చిత్రం అక్టోబర్ 30న ప్రపంచవ్యాప్తంగా భారీ స్థాయిలో థియేటర్లలో విడుదల కానుంది. దాదాపు 20 ఏళ్ల సుదీర్ఘ విరామం తర్వాత వెంకటేష్, త్రివిక్రమ్ కాంబినేషన్ పునరావృతం అవుతుండటంతో సినిమాపై అంచనాలు ఆకాశాన్ని తాకాయి. ఈ నేపథ్యంలో చిత్ర యూనిట్ గురువారం విలేకరుల సమావేశాన్ని (గ్రాండ్ రిలీజ్ ప్రెస్ మీట్) నిర్వహించి పలు విశేషాలను పంచుకుంది.

ఈ కార్యక్రమంలో హీరో విక్టరీ వెంకటేష్ మాట్లాడుతూ.. ‘ఆదర్శ కుటుంబం’ తమ సరికొత్త ప్రయత్నమని, త్రివిక్రమ్ ఈ చిత్రాన్ని అత్యంత అద్భుతంగా తీర్చిదిద్దారని ప్రశంసించారు. తమ గత చిత్రాలైన ‘నువ్వు నాకు నచ్చావ్’, ‘మల్లీశ్వరి’ సినిమాల స్థాయిలో ఈ చిత్రం ప్రతి ఒక్కరినీ అలరిస్తుందని, థియేటర్లలో ప్రేక్షకులకు ఒక గొప్ప అనుభూతిని అందిస్తుందని ధీమా వ్యక్తం చేశారు. అనంతరం దర్శకుడు త్రివిక్రమ్ శ్రీనివాస్ మాట్లాడుతూ.. ‘నువ్వు నాకు నచ్చావ్’, ‘మల్లీశ్వరి’ తర్వాత వెంకటేష్‌తో మళ్లీ ఓ అద్భుతమైన కథతో రావాలనే ఉద్దేశంతోనే ఇంత సమయం తీసుకున్నామని, ఈ చిత్రం అందరికీ కచ్చితంగా నచ్చుతుందనే నమ్మకం ఉందని పేర్కొన్నారు. ప్రెస్ మీట్‌లో పాల్గొన్న నటుడు నారా రోహిత్, కథానాయిక శ్రీనిధి శెట్టి తమ సంతోషాన్ని వ్యక్తం చేస్తూ, ఈ అద్భుతమైన సినిమాలో భాగమైనందుకు గర్వంగా ఉందని తెలిపారు.

సంగీత దర్శకుడు తమన్ మాట్లాడుతూ.. ఈ చిత్రంలో ఎనిమిది పాటలు ఉన్నాయని, జ్యూక్ బాక్స్‌కు ప్రేక్షకుల నుండి లభిస్తున్న ఆదరణ పట్ల హర్షం వ్యక్తం చేశారు. సినిమా ఫైనల్ కాపీ చూసిన తర్వాత తామంతా ఎంతో సంతృప్తిగా, ఆనందంగా ఉన్నామని చెప్పారు. వెంకటేష్ పాజిటివిటీ, శ్రీనిధి శెట్టి ఎనర్జీ, నారా రోహిత్ నటన ఈ సినిమాకు ప్రధాన బలంగా నిలిచాయని కొనియాడారు. ఇప్పటికే విడుదలైన టీజర్, ట్రైలర్, పాటలు విశేష ప్రజాదరణ పొందడంతో బాక్సాఫీస్ వద్ద ఈ 'ఆదర్శ కుటుంబం' ఎలాంటి సంచలనాలు సృష్టిస్తుందో చూడాలని సినీ ప్రియులు ఆసక్తిగా ఎదురుచూస్తున్నారు.

Also Read: అందుకే శ్రీనిధి శెట్టి పాదాలకు దండం పెట్టా.. ఆసక్తికర విషయాన్ని వెల్లడించిన దర్శకుడు త్రివిక్రమ్!