'90s' వెబ్ సిరీస్ మేజిక్ రిపీట్ చేసేందుకు ఆదిత్య హాసన్ సిద్ధం

ఓటీటీ రంగాన్ని ఊపిన '90s: A Middle Class Biopic' వెబ్ సిరీస్ తో సంచలనం సృష్టించిన యువ దర్శకుడు ఆదిత్య హాసన్, ఇప్పుడు సిల్వర్ స్క్రీన్ పైకి అడుగుపెడుతున్నారు. ఆనంద్ దేవరకొండ, వైష్ణవి చైతన్య జంటగా నటిస్తున్న యూత్‌ఫుల్ లవ్ అండ్ ఫ్యామిలీ ఎంటర్‌టైనర్ ‘ఎపిక్ – ఫస్ట్ సెమిస్టర్’ (Epic First Semester) తో ఆయన టాలీవుడ్‌కు పరిచయం అవుతున్నారు. సంచలన విజయం సాధించిన 'బేబీ' కాంబినేషన్‌ను రిపీట్ చేస్తుండటంతో ఈ సినిమాపై ఇప్పటికే భారీ అంచనాలు నెలకొన్నాయి.

సినిమా రంగ ప్రవేశం వెనుక ప్రయాణం
సొంతూరు వనపర్తిలో పదవ తరగతి వరకు చదువుకున్న ఆదిత్య హాసన్, ఆ తర్వాత హైదరాబాద్‌లో డిగ్రీ పూర్తి చేసి మాస్టర్స్ కోసం యూకే వెళ్లారు. ఎవరి దగ్గరికూ అసిస్టెంట్ డైరెక్టర్‌గా వెళ్లకుండా, షార్ట్ ఫిలిమ్స్ అనుభవంతో నేరుగా దర్శకుడిగా మారాలనే లక్ష్యంతో అడుగులు వేశారు. యూకేలో తన సీనియర్ అయిన నవీన్ మేడారం ద్వారా సినీ పరిశ్రమతో పరిచయాలు పెంచుకున్నారు. కమల్ హాసన్ పై ఉన్న వీరాభిమానంతో తన పేరును ఆదిత్య హాసన్‌గా మార్చుకున్న ఈ టెహెంటెడ్ డైరెక్టర్, తన తండ్రి నిజ జీవిత స్ఫూర్తితో '90s' కథను రూపొందించారు. మొదట ఓటీటీ సంస్థ వెనకడుగు వేసినా, ఈటీవీ విన్ ద్వారా ఆ సిరీస్ తెలుగు ప్రేక్షకులను విశేషంగా అలరించింది.

'ఎపిక్' వెనుక అసలు కథ ఇదే
'90s' సిరీస్‌కు కొనసాగింపుగా (సీక్వెల్) వస్తున్న సినిమానే ‘ఎపిక్ – ఫస్ట్ సెమిస్టర్’. ఇందులో సిరీస్‌లోని తమ్ముడి పాత్ర జీవితంలోని ఒక ముఖ్యమైన భాగాన్ని వెండితెరపై ఆవిష్కరించనున్నారు. భవిష్యత్తులో అన్న, అక్క జీవితాలను కూడా వేర్వేరు కథలుగా తీసే ఆలోచన ఉందని ఆదిత్య హాసన్ వెల్లడించారు. ఈ చిత్రానికి 'ఫస్ట్ సెమిస్టర్' అని టైటిల్ పెట్టడానికి కారణం, దీనికి కొనసాగింపుగా 'ఎపిక్ - ఫైనల్ సెమిస్టర్' కూడా రానుండటమే.

కాంబినేషన్ సెంటిమెంట్ అండ్ ప్రెషర్
'బేబీ' చిత్రంతో అద్భుతమైన క్రేజ్ సంపాదించుకున్న ఆనంద్ దేవరకొండ, వైష్ణవి చైతన్య జోడీని ఈ సినిమా కోసం ఎంపిక చేయడం వెనుక నిర్మాత నాగవంశీ వ్యూహం ఉందట. హీరోను తాను ఎంపిక చేయగా, హీరోయిన్ పేరును నాగవంశీ సూచించారని, ఆ జోడీ వల్ల సినిమాపై హైప్ క్రియేట్ అవుతుందని ఆయన చెప్పిన మాటలు నిజమయ్యాయని ఆదిత్య హాసన్ తెలిపారు. నిజ జీవిత సంఘటనల స్ఫూర్తితో ప్రతి ఒక్కరికీ కనెక్ట్ అయ్యేలా తెరకెక్కుతున్న ఈ 'ఎపిక్' సినిమా ప్రేక్షకులకు ఎలాంటి కొత్త అనుభూతిని పంచుతుందో చూడాలి.