కృష్ణవంశీతో విడాకుల పుకార్లు.. పెళ్లి ఓవర్రేటెడ్ అంటూ రమ్యకృష్ణ సంచలన వ్యాఖ్యలు!
సూర్య ఎంటర్టైన్మెంట్ డెస్క్: ప్రముఖ నటి రమ్యకృష్ణ, ప్రముఖ దర్శకుడు కృష్ణవంశీ వేర్వేరు నగరాల్లో నివసిస్తుండటంతో వారి వివాహ బంధంపై గత కొంతకాలంగా వస్తున్న విడిపోతున్నారనే పుకార్లపై రమ్యకృష్ణ స్పష్టత ఇచ్చారు. తాము ఇప్పటికీ వంద శాతం భార్యాభర్తలుగానే ఉన్నామని, అయితే తమ సౌలభ్యం, ఆనందం కోసం వేర్వేరు నగరాల్లో ఉంటున్నామని ఆమె తెలిపారు. ఓ పాడ్కాస్ట్ ఇంటర్వ్యూలో మాట్లాడుతూ, తన కుమారుడు ఎదుగుతున్న సమయంలో తాను టీవీ షో షూటింగ్ కోసం హైదరాబాద్లో ఉన్నానని, తెలంగాణ ఉద్యమ సమయంలో బంద్లు, సమ్మెల కారణంగా స్కూళ్లు మూతపడటంతో ప్రతి 15 రోజులకోసారి చెన్నై వెళ్లి రావడం తనకు, కుమారుడికి ఇబ్బందికరంగా మారిందని వివరించారు. తాను నగరం విడిచి వెళ్లినప్పుడల్లా బాబు అనారోగ్యానికి గురయ్యేవాడని, అందుకే కొడుకును చెన్నైలోని స్కూల్లో చేర్పించాలని నిర్ణయించుకున్నట్లు రమ్యకృష్ణ చెప్పారు.
ఇదే సందర్భంలో వివాహ వ్యవస్థపై రమ్యకృష్ణ ఆసక్తికర వ్యాఖ్యలు చేశారు. బంధాలలో పెళ్లి అనేది ఓవర్రేటెడ్ ప్రక్రియ అని, అవసరమైనప్పుడే పెళ్లి చేసుకోవాలని అభిప్రాయపడ్డారు. నిజానికి పెళ్లి ఎందుకు, కలిసి లివ్-ఇన్ రిలేషన్షిప్లో ఉందామని కృష్ణవంశీ అప్పట్లో చెప్పేవారని, అప్పుడే ఆయన మాటకు సరే అని ఉంటే బాగుండేదని సరదాగా వ్యాఖ్యానించారు. పెళ్లి వల్ల చుట్టూ కుటుంబాలు, అనేక మంది బంధువులు చేరతారని, భాగస్వామితో ఉన్న బంధం కంటే ఆ వ్యవస్థలోని ఇతర వ్యక్తులకే ఎక్కువ జవాబుదారీగా ఉండాల్సి వస్తుందని అన్నారు. అయితే కృష్ణవంశీతో తన బంధం మాత్రం ఎప్పుడూ చక్కగానే ఉంటుందని, భవిష్యత్తులోనూ అలాగే కొనసాగుతుందని రమ్యకృష్ణ స్పష్టం చేశారు.
చంద్రలేఖ, శ్రీ ఆంజనేయం, రంగమార్తాండ చిత్రాల్లో కలిసి పనిచేసిన రమ్యకృష్ణ, కృష్ణవంశీ 2003లో వివాహ బంధంతో ఒక్కటయ్యారు. అంతకుముందు గులాబీ, నిన్నే పెళ్లాడతా, సింధూరం వంటి సినిమాల సెట్స్లో వీరి మధ్య పరిచయం ఏర్పడింది. వీరికి 2005లో కుమారుడు రిత్విక్ వంశీ జన్మించారు. వేర్వేరు నగరాల్లో నివసిస్తున్నందుకే తమ బంధం ఇలా నిలబడిందేమోనని చమత్కరించిన రమ్యకృష్ణ, ఎప్పుడూ గొడవలు పడే కంటే ఇప్పుడు మంచి స్నేహితులుగా ఉన్నామని చెప్పారు. కృష్ణవంశీ రోజు సినిమాతోనే మొదలై సినిమాతోనే ముగుస్తుందని, గతంలో శ్రీ ఆంజనేయం సెకండాఫ్ గురించి తాను విమర్శించినప్పటి నుంచి ఆయన తన పనుల గురించి తనతో పంచుకోవడం తగ్గించారని, ప్రస్తుతం ఎవరి పనుల్లో వారు బిజీగా ఉంటున్నారని తెలిపారు.
ఇక సినిమాల విషయానికి వస్తే రమ్యకృష్ణ చివరిసారిగా జైలర్ 2లో కనిపించారు. ప్రస్తుతం ఆమె రాకా, శ్రీ శ్రీ, పాకెట్ నావెల్, తేరా యార్ హూన్ మెయిన్ సహా పలు చిత్రాల్లో నటిస్తూ బిజీగా ఉన్నారు. ఇటీవల తమిళ బిగ్ బాస్ 10కి గెస్ట్ హోస్ట్గానూ వ్యవహరించి ప్రేక్షకులను అలరించారు.
Also Read: అజిత్ కుమార్కు విలన్గా శివరాజ్ కుమార్.. 'డేర్ డెవిల్' మూవీపై క్రేజీ అప్డేట్!