తొలి వెబ్ సిరీస్‌తోనే రెండు రికార్డులు సృష్టించిన డైరెక్టర్ డేగల బాబు.. ఇండస్ట్రీలో హాట్ టాపిక్!
సూర్య ఎంటర్‌టైన్‌మెంట్ డెస్క్: బుల్లితెరపై నటుడిగా తనకంటూ ప్రత్యేక గుర్తింపు తెచ్చుకున్న ప్రముఖ కమెడియన్, జబర్దస్త్ ఫేమ్ డేగల బాబు దర్శకత్వం వహించిన తాజా వెబ్ సిరీస్ 'లీస్ట్ ఎలిజిబుల్ బ్యాచిలర్'. వైవా హర్ష ప్రధాన పాత్రలో, ఐశ్వర్య హోలక్కల్ కథానాయికగా నటించిన ఈ రొమాంటిక్ కామెడీ ఎంటర్‌టైనర్ ప్రస్తుతం ఓటీటీలో సంచలన విజయంతో దూసుకుపోతోంది. ఈ సిరీస్‌తో దర్శకుడిగా అరంగేట్రం చేసిన డేగల బాబు, తన మొదటి ప్రయత్నంతోనే ఎవరికీ సాధ్యం కాని రీతిలో ఏకంగా రెండు అరుదైన రికార్డులను తన ఖాతాలో వేసుకుని అందరి దృష్టిని ఆకర్షిస్తున్నారు.
సాధారణంగా ఏదైనా వెబ్ సిరీస్ లేదా సినిమా ఏదో ఒక ప్రముఖ ఓటీటీ వేదికపై మాత్రమే విడుదల కావడం చూస్తుంటాం. అయితే డేగల బాబు తెరకెక్కించిన ఈ సిరీస్ ఒకేసారి ఏకంగా రెండు ప్రముఖ ఓటీటీ ప్లాట్‌ఫారమ్‌లలో స్ట్రీమింగ్ అవుతూ రికార్డు సృష్టించింది. ప్రముఖ తెలుగు ఓటీటీ వేదిక అయిన ఈటీవీ విన్‌తో పాటు గ్లోబల్ దిగ్గజం నెట్‌ఫ్లిక్స్‌లో కూడా ఈ సిరీస్ ఏకకాలంలో విడుదల కావడం విశేషం. అంతేకాకుండా కేవలం ఒక్క తెలుగులోనే కాకుండా ఐదు వేర్వేరు భాషలలో ఈ వెబ్ సిరీస్ అందుబాటులోకి వచ్చి సరికొత్త సెన్సేషన్ సృష్టించింది.
పెళ్లి కాని ప్రసాద్‌గా వైవా హర్ష అభినయం, హైపర్ ఆది, శ్రీవిద్య, జీవన్ కుమార్ ల నవ్వించే కామెడీ ట్రాక్స్ ప్రేక్షకులను విపరీతంగా ఆకట్టుకుంటున్నాయి. విడుదలైన మొదటి రోజు నుంచి అన్ని ప్రాంతాల నుంచి పాజిటివ్ రెస్పాన్స్ రావడంతో పాటు రెండు ఓటీటీ వేదికలలోనూ ఈ సిరీస్ ట్రెండింగ్‌లో నిలిచింది. కామెడీతో పాటు క్లైమాక్స్ ఎమోషనల్ సన్నివేశాలు ప్రేక్షకులను కంటతడి పెట్టించేలా ఉన్నాయని, తొలి ప్రయత్నంతోనే డేగల బాబు డైరెక్టర్‌గా తన ప్రతిభను పూర్తిగా నిరూపించుకున్నారని సినీ విశ్లేషకులు ప్రశంసిస్తున్నారు.
జబర్దస్త్ షో ద్వారా నటుడిగా నవ్వులు పంచిన బాబు డేగల, ఇప్పుడు దర్శకుడిగా టాలీవుడ్‌లో తిరుగులేని ముద్ర వేయడం పట్ల టెలివిజన్ మరియు సినీ వర్గాల నుంచి అభినందనలు వెల్లువెత్తుతున్నాయి. ఈ రెండు అరుదైన రికార్డులతో ట్రెండింగ్‌లో నిలిచిన ఈ వెబ్ సిరీస్ సక్సెస్ టాలీవుడ్‌లో హాట్ టాపిక్‌గా మారింది. రాబోయే రోజుల్లో ఆయన నుంచి మరింత వైవిధ్యమైన ప్రాజెక్ట్‌లు రానున్నాయని, ఈ విజయం ఆయన కెరీర్‌కు ఎంతో ప్లస్ అవుతుందని అభిమానులు ఆశిస్తున్నారు.
Also Read: ఐకాన్ స్టార్ అల్లు అర్జున్ - లోకేష్ కనగరాజ్ సినిమా ఆగిపోయిందనే రూమర్లపై క్లారిటీ ఇచ్చిన డైరెక్టర్!
