రామాయణ షూటింగ్‌లో లారా దత్తాకు వింత అనుభవం.. ఇరుక్కుపోయిన బ్రాస్‌లెట్‌ను కట్ చేసిన సిబ్బంది!
సూర్య ఎంటర్‌టైన్‌మెంట్ డెస్క్: నితీష్ తివారీ దర్శకత్వంలో తెరకెక్కిన ప్రతిష్టాత్మక చిత్రం రామాయణ షూటింగ్‌కు సంబంధించిన ఆసక్తికరమైన బిహైండ్ ద సీన్స్ వీడియోను నటి లారా దత్తా పంచుకున్నారు. ఈ చిత్రంలో కైకేయి పాత్రలో నటించిన లారా, తన గెటప్ కోసం పడిన కష్టాలను సరదాగా వివరిస్తూ సోషల్ మీడియాలో పోస్ట్ చేసిన వీడియో ఇప్పుడు నెట్టింట వైరల్‌గా మారింది. షూటింగ్ సమయంలో తన చేతికి వేసుకున్న బ్రాస్‌లెట్ గట్టిగా ఇరుక్కుపోవడంతో, దానిని తొలగించడానికి సిబ్బంది హ్యాక్సా బ్లేడ్‌తో కట్ చేయాల్సి వచ్చిందని ఆమె తెలిపారు.
తన చర్మానికి ఎటువంటి గాయం కాకుండా సిబ్బంది ఎంతో జాగ్రత్తగా ఆ బ్రాస్‌లెట్‌ను కత్తిరించి విముక్తి కల్పించారని లారా వెల్లడించారు. ఈ ఘటనపై సరదాగా స్పందిస్తూ, తెరపై ఇలా కనిపించడం వెనుక తెరవెనుక ఎన్నో వ్యవహారాలు జరుగుతుంటాయి, అందులో నా మణికట్టును దాదాపు రంపంతో కోసేంత పని జరిగిందంటూ తన పోస్ట్‌లో చమత్కరించారు. భారీ స్థాయిలో నిర్మిస్తున్న ఈ ప్రాజెక్టు కోసం కాస్ట్యూమ్స్, ఆభరణాల విషయంలో తీసుకున్న శ్రద్ధను ఈ వీడియో ద్వారా ఆమె అభిమానులకు చూపించారు.
ఇటీవల సినిమా కాస్ట్యూమ్స్, ఆభరణాల రూపకల్పనపై వస్తున్న చర్చల నేపథ్యంలో లారా దత్తా తన అభిప్రాయాలను కూడా స్పష్టం చేశారు. కేకయ దేశానికి చెందిన కైకేయి ఆభరణాలు మిగిలిన ఇద్దరు రాణుల ఆభరణాల కంటే భిన్నంగా ఉండాలని దర్శకుడు నితీష్ తివారీతో మొదట్లోనే చర్చించినట్లు ఆమె గుర్తు చేసుకున్నారు. మిథిలా, అయోధ్య, లంక రాజ్యాల సంస్కృతులను వేరు చేసి చూపించేలా ఆభరణాలు, వస్త్రధారణలో ఒక ప్రామాణికతను పాటించారని వివరించారు.
రణబీర్ కపూర్, సాయి పల్లవి, యశ్ వంటి తారాగణంతో రూపొందిన రామాయణ మొదటి భాగం బాక్సాఫీస్ వద్ద అద్భుతమైన వసూళ్లతో దూసుకుపోతోంది. విడుదలైన తొమ్మిది రోజుల్లోనే ప్రపంచవ్యాప్తంగా రూ.1,100 కోట్లకు పైగా గ్రాస్ కలెక్షన్లను దాటి ఘన విజయం సాధించింది. ఈ చిత్రానికి కొనసాగింపుగా రెండో భాగం 2028లో ప్రేక్షకుల ముందుకు రానుంది.
Also Read: భారీ పారితోషికం ఇచ్చినా ఆఫర్లు వద్దంటున్నా.. డబ్బుతో పనిలేదన్న పంకజ్ త్రిపాఠి!
