వాల్‌మార్ట్ ఉద్యోగులకు బంపర్ ఆఫర్
సూర్య బిజినెస్ డెస్క్: ప్రముఖ అంతర్జాతీయ రిటైల్ దిగ్గజం 'వాల్‌మార్ట్' (Walmart) తమ ఉద్యోగుల ఆరోగ్య భద్రతను పెంపొందించే దిశగా కీలక నిర్ణయం తీసుకుంది. తమ సంస్థలో పనిచేస్తున్న లక్షలాది మంది ఉద్యోగులకు సుమారు 250కి పైగా రకాల ప్రిస్క్రిప్షన్ ఔషధాలను పూర్తిగా ఉచితంగా అందించనున్నట్లు ప్రకటించింది. అనేక బహుళజాతి కంపెనీలు ఆరోగ్య రక్షణ వ్యయాలను తగ్గించుకునేందుకు ప్రయత్నిస్తున్న తరుణంలో, వాల్‌మార్ట్ తమ ఉద్యోగుల సంక్షేమం కోసం ఆరోగ్య ప్రయోజనాలను మరింత విస్తరించడం కార్పొరేట్ వర్గాల్లో విశేష ప్రాధాన్యతను సంతరించుకుంది.
ఈ నూతన ఆరోగ్య పథకం కింద టైప్-2 మధుమేహానికి ఉపయోగించే ఇన్సులిన్ ఉత్పత్తులు, ఉబ్బసానికి సంబంధించిన ఇన్హేలర్లు మరియు ఇతర నివారణ మందులను ఉద్యోగులు ఉచితంగా పొందవచ్చు. దీనికి తోడు మల్టిపుల్ స్క్లెరోసిస్, పార్కిన్సన్స్ వంటి తీవ్రమైన వ్యాధులతో బాధపడుతున్న ఉద్యోగుల కోసం ప్రముఖ మెడికల్ సెంటర్ల నుంచి సెకండ్ ఒపీనియన్ పొందే వెసులుబాటును కూడా కంపెనీ కల్పించింది. అలాగే నవజాత శిశువులు ఆసుపత్రిలోని ఐసియూ (NICU) విభాగంలో చికిత్స పొందుతున్నప్పుడు ఉద్యోగులకు 12 వారాల వేతనంతో కూడిన ప్రత్యేక సెలవులను కూడా మంజూరు చేయనుంది.
ఉద్యోగుల సంక్షేమం మరియు వారిని నిలబెట్టుకోవడమే లక్ష్యంగా గత పదేళ్లలో వాల్‌మార్ట్ అనేక సవరణలు చేసింది. ప్రారంభ వేతనాలను పెంచడంతో పాటు విద్య మరియు శిక్షణ కోర్సుల కోసం భారీగా నిధులను వెచ్చించింది. రాబోయే సంవత్సరంలో హెల్త్ ఇన్సూరెన్స్ ప్రీమియం ధరలు పెరిగినప్పటికీ, అంతర్గత నిర్వహణ సమర్థత ద్వారా తమ ఉద్యోగులపై ఆ భారం పడకుండా తగిన చర్యలు తీసుకుంటున్నట్లు కంపెనీ స్పష్టం చేసింది. ఈ నిర్ణయం ఉద్యోగుల ఆరోగ్య భద్రతకు పెద్దపీట వేస్తూ రిటైల్ రంగంలో కొత్త ప్రమాణాలను నెలకొల్పుతోందని విశ్లేషకులు భావిస్తున్నారు.
