ఎలక్ట్రిక్ మోటార్ సైకిల్ రంగంలో.. యూనికార్న్ హోటను సాధించిన 'స్టార్క్ ఫ్యూచర్'
సూర్య బిజినెస్ డెస్క్: అంతర్జాతీయ ఎలక్ట్రిక్ వాహన రంగంలో సరికొత్త చరిత్ర సృష్టించబడింది. ప్రముఖ ఎలక్ట్రిక్ మోటార్ సైకిల్ తయారీ సంస్థ 'స్టార్క్ ఫ్యూచర్' (Stark Future) అరుదైన మైలురాయిని అధిగమించింది. కనీసం 150 మిలియన్ యూరోలకు పైగా నిధులను సమీకరించడం ద్వారా యూరప్ దేశాల చరిత్రలోనే యూనికార్న్ హోదా (Unicorn Status) సాధించిన తొలి ఎలక్ట్రిక్ మోటార్ సైకిల్ కంపెనీగా ఈ సంస్థ అవతరించింది. హైల్యాండ్ యూరప్ ఆధ్వర్యంలో జరిగిన ఈ నిధుల సమీకరణ కార్యక్రమం ద్వారా గ్లోబల్ మార్కెట్లో కంపెనీ విలువ ఒక్కసారిగా పుంజుకుంది.
సాంప్రదాయ ఇంధన బైక్లతో పోటీపడే విధంగా అత్యుత్తమ పనితీరు, సులభమైన నిర్వహణను అందించే లక్ష్యంతో స్టార్క్ ఫ్యూచర్ తన ఉత్పత్తులను మార్కెట్లోకి తీసుకొచ్చింది. కేవలం పర్యావరణ పరిరక్షణ ఒక్కటే కాకుండా, ప్రతి ఒక్కరూ ఇష్టపడేలా అత్యున్నత పనితీరు గల ఎలక్ట్రిక్ బైక్లను రూపొందించడమే తమ విజయ రహస్యమని కంపెనీ సీఈఓ ఆంటన్ వాస్ తెలిపారు. ప్రస్తుతం మోటోక్రాస్, ఎండ్యూరో మరియు సూపర్మోటో మార్కెట్లలో గణనీయమైన వాటాను దక్కించుకున్న ఈ సంస్థ, సమీప భవిష్యత్తులో మరింత విస్తృతమైన మార్కెట్లోకి ప్రవేశించి తమ వాటాను పదింతలు పెంచుకోవాలని ప్రణాళికలు రచిస్తోంది.
పరిశ్రమలో మిశ్రమ పరిస్థితులు నెలకొన్న తరుణంలో స్టార్క్ ఫ్యూచర్ సాధించిన ఈ వృద్ధి ఎలక్ట్రిక్ వాహన ప్రియులను ఆకట్టుకుంటోంది. గ్లోబల్ మార్కెట్లో స్థిరమైన వృద్ధిని సాధిస్తూ, అత్యాధునిక సాంకేతికతతో కూడిన టూ-వీలర్లను అందించడంలో ఈ సంస్థ ప్రత్యేక గుర్తింపు తెచ్చుకుంది. తాజాగా సమకూరిన ఈ భారీ నిధులతో కంపెనీ తన ఉత్పత్తి సామర్థ్యాన్ని మరింత విస్తరించడంతో పాటు, అంతర్జాతీయ మార్కెట్లో తన ఉనికిని మరింత బలోపేతం చేసేందుకు చర్యలు చేపట్టనుంది.