దుబాయ్‌కి కుల్లు దానిమ్మ పండ్ల ఎగుమతి..600 మంది రైతులకు అంతర్జాతీయ మార్కెట్ అనుసంధానం
సూర్య బిజినెస్ డెస్క్: హిమాచల్ ప్రదేశ్‌లోని కుల్లు జిల్లాకు చెందిన 'సిందూరి' రకం దానిమ్మ పండ్లను దుబాయ్‌కి ఎగుమతి చేసేందుకు కేంద్ర వాణిజ్య మరియు పరిశ్రమల మంత్రిత్వ శాఖ పరిధిలోని అగ్రికల్చరల్ అండ్ ప్రాసెస్డ్ ఫుడ్ ప్రొడక్ట్స్ ఎక్స్‌పోర్ట్ డెవలప్‌మెంట్ అథారిటీ (అపెడా) విజయవంతంగా సౌకర్యం కల్పించింది. స్థానిక రైతులు మరియు భుంతర్ రైతు ఉత్పత్తిదారుల సంస్థ (ఎఫ్పీఓ) ఉత్పత్తులను అంతర్జాతీయ మార్కెట్‌కు అనుసంధానిస్తూ సుమారు 1.3 మెట్రిక్ టన్నుల దానిమ్మ పండ్ల తొలి రవాణాను పంపించారు. ఈ చొరవ ద్వారా సుమారు 600 మంది రైతులకు గ్లోబల్ మార్కెట్‌లో నేరుగా విక్రయించే అవకాశం లభించింది.
ఉత్తరప్రదేశ్ కేంద్రంగా పనిచేసే అమామా ఎక్స్‌పోర్ట్స్ సంస్థ ద్వారా 2 కిలోల బరువు కలిగిన 650 పెట్టెల దానిమ్మ పండ్ల సరుకును ఎగుమతి చేశారు. కుల్లు జిల్లా ఉద్యానవన శాఖ పరిపాలనా యంత్రాంగం మరియు అపెడా సంయుక్తంగా ఈ సకరణ మరియు సమన్వయ ప్రక్రియను పూర్తి చేశాయి. దేశీయ మార్కెట్ ధరలతో పోలిస్తే అంతర్జాతీయ ఎగుమతి ద్వారా పాల్గొన్న రైతులకు ఏకంగా 50 శాతం అదనపు ధర లభించడం విశేషం. సిందూరి రకం దానిమ్మ పండ్లు వాటి ఎర్రటి రంగు, రసవంతమైన గింజలు మరియు తీపి-వగరు రుచితో అంతర్జాతీయ వినియోగదారులను విశేషంగా ఆకట్టుకుంటున్నాయి.
అపెడా ఛైర్మన్ అభిషేక్ దేవ్ ఈ రవాణా వాహనాన్ని అధికారికంగా ప్రారంభించారు. ఈ కార్యక్రమంలో ఉద్యానవన శాఖ అధికారులు, ఎగుమతిదారులు, రైతు ఉత్పత్తిదారుల సంఘాల ప్రతినిధులు పాల్గొన్నారు. హిమాచల్ ప్రదేశ్ కేవలం యాపిల్స్ ఎగుమతికే పరిమితం కాకుండా దానిమ్మ, పర్సిమ్మన్ మరియు ప్రాసెస్డ్ ఉత్పత్తుల ఎగుమతుల వైపు అడుగులు వేయడం ఆహ్వానించదగ్గ పరిణామమని అధికారులు పేర్కొన్నారు. ఎఫ్‌పీఓల ద్వారా చిన్న సన్నకారు రైతుల ఆదాయాన్ని పెంచడంలో మరియు అంతర్జాతీయ స్థాయిలో భారతీయ వ్యవసాయ ఉత్పత్తులకు గుర్తింపు తీసుకురావడంలో ఇది కీలక పాత్ర పోషిస్తుందని విశ్లేషకులు భావిస్తున్నారు.
