బిలియన్ల డాలర్ల నష్టాలకు ముందే వడ్డీ రేట్ల బెట్టింగ్‌లపై ఆంక్షలకు విజ్ఞప్తి
సూర్య బిజినెస్ డెస్క్: చిలీ దేశానికి చెందిన ప్రైవేట్ పెన్షన్ ఫండ్ మేనేజర్లు (ఎఎఫ్‌పి) అమెరికా వడ్డీ రేట్లపై తాము చేసిన భారీ బెట్టింగ్‌ల ద్వారా బిలియన్ల డాలర్ల నష్టాలను చవిచూడడానికి ముందే, ఆ లావాదేవీలపై ఆంక్షలు విధించాలని రెగ్యులేటర్లను కోరినట్లు బ్లూమ్‌బెర్గ్ నివేదిక వెల్లడించింది. అమెరికా వడ్డీ రేట్లు తగ్గుతాయనే అంచనాతో చేసిన ఈ స్వాప్ డీల్స్ తీవ్ర ప్రత్యామ్నాయ ఫలితాలను ఇవ్వడంతో పెన్షన్ ఫండ్లు బిలియన్ల డాలర్ల నష్టాల్లోకి కూరుకుపోయాయి. అయితే ఈ నష్టాల భారం పెరగకముందే నియంత్రణా సంస్థల నుంచి భద్రతా పరిమితులు విధించాలని నిధి నిర్వాహకులు కోరినట్లు సమాచారం వెలువడింది.
అత్యధిక లాభాలను ఆర్జించే క్రమంలో ఒక నిధి నిర్వాహక సంస్థ మాత్రమే వేరుగా ఈ బెట్టింగ్‌ల నుంచి తప్పుకుంటే పోటీలో వెనుకబడిపోతామనే భావనతో, అన్ని సంస్థలకు వర్తించేలా నియంత్రణా మండలి స్పష్టమైన పరిమితులను విధించాలని విజ్ఞప్తి చేసినట్లు తెలుస్తోంది. గత రెండు ఏళ్లుగా అమెరికా బాండ్ల వడ్డీ రేట్ల క్షీణతపై ఆధారపడి వేల కోట్ల డాలర్ల కాంట్రాక్టులను కుదుర్చుకున్నారు. కానీ, అనూహ్యంగా గ్లోబల్ ద్రవ్యోల్బణ ఒత్తిళ్లు మరియు అమెరికా వడ్డీ రేట్లు పెరగడంతో ఈ గణాకాలు తలకిందులై, ఫండ్ల విలువ శరవేగంగా క్షీణించింది.
ఈ పరిణామాల నేపథ్యంలో చిలీ పెన్షన్ రెగ్యులేటరీ బాడీ ఏప్రిల్ నెలలోనే రిస్క్ పరిమితులను నిర్దేశించి, నవంబర్ నాటికి తమ ఎక్స్‌పోజర్‌ను తగ్గించుకోవాలని ఫండ్ మేనేజర్లను ఆదేశించింది. అయితే వడ్డీ రేట్లు మరింత పెరగడంతో ఈ కాంట్రాక్టుల నుంచి బయటపడటం ఫండ్లకు మరింత ప్రియంగా మారి భారీ నష్టాలకు దారితీసింది. పెంఛనుదారుల ప్రయోజనాలను కాపాడే క్రమంలో నియమ నిబంధనలను సవరించినప్పటికీ, ఈ బెట్టింగ్ సంక్షోభం చిలీ రాజకీయంలోనూ, కాంగ్రెస్‌లోనూ తీవ్ర చర్చనీయాంశంగా మారింది. ఫండ్ల పనితీరును దీర్ఘకాలిక ప్రాతిపదికన మాత్రమే అంచనా వేయాలని పెన్షన్ ఫండ్ సంఘం సభ్యులకు విజ్ఞప్తి చేసింది.
