ఐఫోన్ బదులు బంగారం కొని జాక్‌పాట్: రూ. 49,770 పెడితే మూడేళ్లలో రూ. 1.14 లక్షలు..
సూర్య ట్రెండింగ్ & బిజినెస్ డెస్క్: ఆధునిక సమాజంలో ప్రీమియం స్మార్ట్‌ఫోన్లు, ఖరీదైన గ్యాడ్జెట్లను సొంతం చేసుకోవాలనే వ్యామోహం పెరిగిపోతున్న వేళ.. వినూత్న ఆలోచనతో డబుల్ లాభాలు పొందిన ఓ వ్యక్తి కథనం ప్రస్తుతం సోషల్ మీడియాలో విపరీతంగా వైరల్ అవుతోంది. ఐఫోన్ కొనడానికి డబ్బులు సరిపోకపోవడంతో భార్య ఇచ్చిన సలహాతో బంగారంలో పెట్టుబడి పెట్టిన ఆ వ్యక్తికి మూడేళ్లలోనే ఊహించని సంపద సమకూరింది.
ఓ వ్యక్తి దాదాపు మూడేళ్ల పాటు పొదుపు చేసినప్పటికీ ఐఫోన్ కొనడానికి కావాల్సిన పూర్తి మొత్తం సమకూరలేదు. దీంతో అతని భార్య ఇచ్చిన విలువైన సలహాతో.. ఆ డబ్బులతో దాదాపు రూ. 49,770 విలువైన రెండు బంగారు ఉంగరాలను కొనుగోలు చేశాడు. ఇటీవల మూడేళ్ల తర్వాత ఆ ఉంగరాల ప్రస్తుత విలువను తెలుసుకునేందుకు స్థానిక నగల దుకాణానికి వెళ్లగా.. వాటి విలువ ఏకంగా రూ. 1.14 లక్షలకు చేరిందని తెలిసి అతడు ఆశ్చర్యపోయాడు. కేవలం మూడేళ్ల వ్యవధిలోనే ఏకంగా రూ. 64,000 పైగా లాభం వచ్చి పెట్టుబడి రెట్టింపు కంటే ఎక్కువైంది.
ఒకవేళ ఆనాడు ఆ డబ్బుతో ఐఫోన్ కొని ఉంటే, ఈపాటికి ఆ ఫోన్ మోడల్ పాతబడిపోయి దాని విలువ దారుణంగా పడిపోయి ఉండేదని (డిప్రిషియేటింగ్ అసెట్), కానీ బంగారం రూపంలో పెట్టిన పెట్టుబడి విలువ రెట్టింపు అయిందని నెటిజన్లు ప్రశంసిస్తున్నారు. ఇటీవల ఒక వ్యక్తి ఐఫోన్ కోసం కుటుంబ వారసత్వంగా వచ్చిన బంగారాన్ని అమ్మేసిన ఘటనతో పోల్చుతూ.. ఆర్థిక క్రమశిక్షణ, సరైన సమయంలో పెట్టుబడి పెట్టడం వల్ల కలిగే ప్రయోజనాలకు ఈ ఉదంతం నిదర్శనమని కామెంట్లు చేస్తున్నారు. "అన్నిటికంటే ఉత్తమమైన పెట్టుబడి సలహాలు ఒక్కోసారి మన ఇంట్లోనే లభిస్తాయి" అంటూ నెటిజన్లు ఆ భార్య సమయస్ఫూర్తిని కొనియాడుతున్నారు.
