యువత వ్యాపార రంగంలోకి రావాలి

మెలియాపుట్టి. అక్టోబర్ 18. మేజర్ న్యూస్...

యువత ఉద్యోగాల కోసం ఎదురుచూడకుండా వ్యాపార రంగంలోకి అడుగుపెట్టి స్వయం ఉపాధి సాధించాలని పాతపట్నం ఎమ్మెల్యే మామిడి గోవిందరావు సూచించారు. నాణ్యమైన ఉత్పత్తులను అందిస్తూ వినియోగదారుల నమ్మకాన్ని పొందినప్పుడే వ్యాపారంలో మంచి గుర్తింపు లభిస్తుందని పేర్కొన్నారు. పాతపట్నంలోని బ్రాహ్మణ వీధిలో ఏర్పాటు చేసిన నేచురల్ ఫుడ్ ప్రాసెసింగ్ యూనిట్‌ను ఆదివారం ఆయన ప్రారంభించారు.
ఈ సందర్భంగా యూనిట్‌ను పరిశీలించిన ఎమ్మెల్యే, అక్కడ చేపడుతున్న కార్యకలాపాలు, ఉత్పత్తుల తయారీ విధానం గురించి వివరాలు తెలుసుకున్నారు. నాణ్యతకు ప్రాధాన్యమిస్తూ ఉత్పత్తులను తయారు చేయాలని నిర్వాహకులకు సూచించారు. ప్రస్తుత పరిస్థితుల్లో యువతకు వ్యాపార రంగంలో అనేక అవకాశాలు ఉన్నాయని, వాటిని సద్వినియోగం చేసుకోవాలని అన్నారు.
స్థానికంగా లభించే వనరులను ఉపయోగించుకొని ఆహార ఉత్పత్తుల తయారీ, ప్రాసెసింగ్ రంగాల్లో యువత ముందుకు రావాలని సూచించారు. నాణ్యమైన ఉత్పత్తులను మార్కెట్‌లోకి తీసుకువచ్చి వినియోగదారుల ఆదరణ పొందేలా కృషి చేయాలన్నారు. వ్యాపార రంగంలో అభివృద్ధి సాధించడంతోపాటు మరికొందరికి ఉపాధి కల్పించే దిశగా యువత ఆలోచించాలని పేర్కొన్నారు.
ఈ కార్యక్రమంలో స్థానిక నాయకులు, టీడీపీ కార్యకర్తలు పాల్గొన్నారు.