విజయవాడలో వైభవంగా ‘పాన్ ఐఐటీ సమ్మిట్’: డ్రోన్, ఈవీ టెక్నాలజీలను పరిశీలించిన సీఎం చంద్రబాబు

విజయవాడ, సూర్య ప్రతినిధి:  విజయవాడలో నిర్వహించిన ‘పాన్ ఐఐటీ సమ్మిట్’ (Pan IIT Summit) కార్యక్రమానికి ముఖ్యమంత్రి నారా చంద్రబాబు నాయుడు హాజరయ్యారు. ఈ సమ్మిట్‌లో భాగంగా ఏర్పాటు చేసిన వివిధ సాంకేతిక వినూత్న స్టాళ్లను ఆయన ఆసక్తిగా పరిశీలించారు. ముఖ్యంగా 'ఆక్సి ఏరోస్పేస్' (Axy Aerospace) రూపొందించిన సరికొత్త డ్రోన్ టెక్నాలజీని పరిశీలించిన సీఎం, ఆ డ్రోన్‌పై తన సంతకం చేసి నిర్వాహకులను అభినందించారు.

అనంతరం పెట్రోల్ టూవీలర్లను విద్యుత్ వాహనాలుగా (EV) మార్చే సాంకేతికతకు సంబంధించిన స్టాల్‌ను సీఎం సందర్శించారు. సాధారణ వాహనాలను ఈవీలుగా కన్వర్ట్ చేసే విధానం, దానివల్ల కలిగే ఖర్చు, పర్యావరణ ప్రయోజనాల గురించి నిర్వాహకులను అడిగి తెలుసుకున్నారు. ఈ సందర్భంగా రాష్ట్రంలో సాంకేతిక విప్లవాన్ని ప్రోత్సహించేలా, ఆంధ్రప్రదేశ్‌లోనే ఒక ఈవీ (EV) ప్రాజెక్టును ఏర్పాటు చేసేలా తగిన చర్యలు తీసుకోవాలని సంబంధిత అధికారులను ఆదేశించారు.