విజయనగరం నగరపాలక సంస్థ ఎన్నికల పోలింగ్ తేదీ ఈ నెల 29కి మార్పు *కౌంటింగ్ యధావిధిగా 30వ తేదీనే* -- జిల్లా ఎన్నికల అధికారి, కలెక్టర్ ఎస్. రాంసుందర్ రెడ్డి
విజయనగరం, మేజర్ న్యూస్ , అక్టోబర్ 20:
మున్సిపల్ ఎన్నికలు–2026 నేపథ్యంలో విజయనగరం నగరపాలక సంస్థకు ఈ నెల 28వ తేదీన నిర్వహించాల్సిన పోలింగ్‌ను 29వ తేదీకి మార్పు చేసినట్లు జిల్లా ఎన్నికల అధికారి, జిల్లా కలెక్టర్ ఎస్. రాంసుందర్ రెడ్డి తెలిపారు.
ఈ నెల 27వ తేదీన విజయనగరంలో శ్రీ పైడితల్లి అమ్మవారి సిరిమాను జాతర నేపథ్యంలో, ప్రజల సౌకర్యార్థం మరియు ఎన్నికల నిర్వహణకు ఎలాంటి ఇబ్బందులు కలగకుండా ఉండేందుకు పోలింగ్ తేదీని మార్చాలని జిల్లా ఎన్నికల అధికారి రాష్ట్ర ఎన్నికల సంఘం అధికారులకు విజ్ఞప్తి చేసిన విషయం విధితమే. ఈ విజ్ఞప్తిని పరిగణనలోకి తీసుకున్న రాష్ట్ర ఎన్నికల సంఘం విజయనగరం నగరపాలక సంస్థకు పోలింగ్ తేదీని ఈ నెల 29వ తేదీగా నిర్ణయించినట్లు కలెక్టర్ తెలిపారు.
కౌంటింగ్ ప్రక్రియలో ఎలాంటి మార్పు లేదని, ముందుగా ప్రకటించిన షెడ్యూల్ ప్రకారం ఈ నెల 30వ తేదీనే ఓట్ల లెక్కింపు నిర్వహించనున్నట్లు కలెక్టర్ స్పష్టం చేశారు.
అదేవిధంగా, బొబ్బిలి మున్సిపాలిటీ, నెల్లిమర్ల నగర పంచాయతీలకు సంబంధించి పోలింగ్, కౌంటింగ్ తేదీల్లో ఎలాంటి మార్పు లేదని, ముందుగా ప్రకటించిన షెడ్యూల్ ప్రకారమే ఎన్నికల ప్రక్రియ కొనసాగుతుందని కలెక్టర్ వివరించారు.
విజయనగరం నగరపాలక సంస్థ ఎన్నికల పోలింగ్ తేదీలో జరిగిన మార్పును ప్రజలు, రాజకీయ పార్టీలు, అభ్యర్థులు గమనించాలని జిల్లా ఎన్నికల అధికారి, కలెక్టర్ కోరారు.
శ్రీనివాస్ విజయనగరం
