విద్యార్థులకు 7,300 సైకిళ్ల పంపిణీ

అనంతపురం బ్యూరో 

విద్యార్థులకు 7,300 సైకిళ్ల పంపిణీ

కళ్యాణదుర్గం: విద్యార్థుల సౌకర్యార్థం చేపట్టిన ‘అమిలినేని విద్యాచక్రం’ కార్యక్రమంలో భాగంగా కరణం చిక్కప్ప క్రీడా మైదానంలో 9, 10వ తరగతి, ఇంటర్ విద్యార్థులకు సైకిళ్లు పంపిణీ చేశారు. ఒక్కరోజే సుమారు 1,500 మంది విద్యార్థులకు సైకిళ్లు అందజేయగా, నియోజకవర్గ వ్యాప్తంగా మొత్తం 7,300 సైకిళ్లు పంపిణీ చేయనున్నట్లు ఎమ్మెల్యే అమిలినేని సురేంద్రబాబు తెలిపారు.

ఎస్సార్సీ ట్రస్ట్, సంస్థ సిబ్బంది సహకారంతో సుమారు రూ.5 కోట్ల వ్యయంతో ఈ కార్యక్రమాన్ని చేపట్టినట్లు ఆయన పేర్కొన్నారు. విద్యార్థుల అభ్యర్థన మేరకు త్వరలో 500 మంది డిగ్రీ విద్యార్థులకు సైతం సైకిళ్లు అందిస్తామని ప్రకటించారు.

నియోజకవర్గ అభివృద్ధిలో భాగంగా మున్సిపాలిటీలో డ్రైనేజీలు, సీసీ రహదారుల నిర్మాణం చేపడుతున్నామని, రానున్న రెండేళ్లలో మరింత అభివృద్ధి చేస్తామని ఎమ్మెల్యే తెలిపారు. బీటీపీ ప్రాజెక్టును 2028 మార్చి నాటికి పూర్తి చేసి నీటిని అందించేందుకు చర్యలు కొనసాగుతున్నాయని వెల్లడించారు.

కార్యక్రమంలో ఎస్సార్సీ చైర్మన్ ముత్తినేని రాజగోపాల్, దేవినేని వెంకటేష్, మహీధర్‌రెడ్డి, ఎస్సార్సీ ఎండీ అమిలినేని యశ్వంత్ తదితరులు పాల్గొన్నారు.