విద్యార్థులకు 600 సైకిళ్ల పంపిణీ.

కళ్యాణదుర్గం టౌన్ ప్రతినిధి రంగస్వామి :-

 కుందుర్పి మండలంలోని ప్రభుత్వ విద్యాసంస్థల్లో చదువుతున్న విద్యార్థులకు కళ్యాణదుర్గం ఎమ్మెల్యే అమిలినేని సురేంద్రబాబు ఆధ్వర్యంలో 600 సైకిళ్లను పంపిణీ చేయనున్నారు. ఈ కార్యక్రమం శుక్రవారం (09-10-2026) ఉదయం 8.30 గంటలకు కుందుర్పి మండల కేంద్రంలోని జిల్లా పరిషత్ ఉన్నత పాఠశాల మైదానంలో నిర్వహించనున్నట్లు టీడీపీ మండల అధ్యక్షుడు జి. ధనుంజయ తెలిపారు. కుందుర్పి జెడ్పీ ఉన్నత పాఠశాల, ప్రభుత్వ జూనియర్ కళాశాలలో 9, 10వ తరగతి, ఇంటర్మీడియట్ చదువుతున్న విద్యార్థులకు సైకిళ్లను అందజేయనున్నట్లు పేర్కొన్నారు. గ్రామీణ ప్రాంతాల నుంచి పాఠశాలలు, కళాశాలలకు వచ్చే విద్యార్థుల రాకపోకలకు సైకిళ్లు ఎంతగానో ఉపయోగపడతాయని తెలిపారు. విద్యార్థుల విద్యాభ్యాసాన్ని ప్రోత్సహించడంతో పాటు వారి ప్రయాణ ఇబ్బందులను తగ్గించాలనే ఉద్దేశంతో ఈ కార్యక్రమాన్ని నిర్వహిస్తున్నట్లు చెప్పారు. సైకిళ్ల పంపిణీ కార్యక్రమాన్ని విజయవంతం చేసేందుకు అవసరమైన ఏర్పాట్లు చేస్తున్నట్లు తెలిపారు. విద్యార్థులు, తల్లిదండ్రులు, ఉపాధ్యాయులు కార్యక్రమానికి హాజరై విజయవంతం చేయాలని కోరారు. అదేవిధంగా కుందుర్పి మండలంలోని వివిధ హోదాల్లో ఉన్న టీడీపీ నాయకులు, కార్యకర్తలు కార్యక్రమానికి తప్పనిసరిగా హాజరై విజయవంతం చేయాలని టీడీపీ మండల అధ్యక్షుడు జి. ధనుంజయ విజ్ఞప్తి చేశారు.