అమెరికాలో చదువుకునే విదేశీ విద్యార్థులకు భారీ షాక్: వర్క్ పర్మిట్ కోసం 70 వేల డాలర్ల ఫీజు.. ట్రంప్ సర్కారు సంచలన ప్రతిపాదన!

సూర్య అంతర్జాతీయ డెస్క్: అమెరికాలో ఉన్నత విద్యను అభ్యసిస్తూ అక్కడే ఉద్యోగం చేయాలని కలలుగనే వేలాది మంది భారతీయ విద్యార్థుల నెత్తిన డొనాల్డ్ ట్రంప్ సర్కారు పిడుగులాంటి వార్త మోపింది. అమెరికాలోని కళాశాలలు, విశ్వవిద్యాలయాల్లో చదువుకునే అంతర్జాతీయ ఎఫ్-1 (F-1) వీసా విద్యార్థులు చదువు పూర్తయిన తర్వాత ఆప్షనల్ ప్రాక్టికల్ ట్రైనింగ్ (OPT) ప్రోగ్రామ్ ద్వారా ఉద్యోగం లేదా నైపుణ్య శిక్షణ పొందడానికి ఏకంగా 70,000 డాలర్ల (భారత కరెన్సీలో దాదాపు రూ. 67 లక్షలకు పైగా) భారీ ఫీజు విధించేందుకు యూఎస్ డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీ (DHS) సరికొత్త ముసాయిదా ప్రతిపాదనను తెరపైకి తెచ్చింది. ప్రస్తుతమున్న సుమారు 500 డాలర్ల దరఖాస్తు రుసుము స్థానంలో ఈ భారీ పెంపును ప్రతిపాదించడం అంతర్జాతీయ విద్యా వర్గాల్లో తీవ్ర ప్రకంపనలు సృష్టిస్తోంది.

హోమ్‌ల్యాండ్ సెక్యూరిటీ శాఖ వెల్లడించిన ప్రతిపాదనల ప్రకారం.. మొదటిసారి ఓపీటీ కోసం దరఖాస్తు చేసుకునే విద్యార్థుల కోసం విద్యాసంస్థలు ఈ 70,000 డాలర్ల రుసుమును చెల్లించాల్సి ఉంటుంది. అంతేకాకుండా సైన్స్, టెక్నాలజీ, ఇంజనీరింగ్ మరియు మ్యాథమెటిక్స్ (STEM) విభాగాల విద్యార్థులు పొందే పొడిగింపు (ఎక్స్‌టెన్షన్) లేదా తదుపరి అనుమతులకు మరో 30,000 డాలర్ల (సుమారు రూ. 29 లక్షలు) అదనపు ఫీజును నిర్దేశించారు. అమెరికా కార్మిక మార్కెట్‌లోకి విదేశీయులు సులభంగా ప్రవేశించడానికి, తక్కువ వేతనాలకే విదేశీ శ్రామికులను నియమించుకోవడానికి ఓపీటీ ఒక పెరటి దారిగా (బ్యాక్‌డోర్) మారిపోయిందని, అమెరికన్ పౌరుల ఉద్యోగావకాశాలను రక్షించేందుకే ఈ కఠిన నిబంధనలు తెస్తున్నామని డీహెచ్ఎస్ సమర్థించుకుంది.

ఈ నిర్ణయం అమెరికాలో అత్యధిక సంఖ్యలో ఉన్న భారతీయ విద్యార్థులతో పాటు యూఎస్ విశ్వవిద్యాలయాలు, టెక్నాలజీ దిగ్గజాలపై తీవ్ర ప్రతికూల ప్రభావం చూపనుంది. సాధారణంగా విదేశీ విద్యార్థుల ట్యూషన్ ఫీజులపై ఎక్కువగా ఆధారపడే అమెరికన్ యూనివర్సిటీలకు ఇది తీరని నష్టాన్ని కలిగిస్తుందని విద్యావేత్తలు ఆందోళన వ్యక్తం చేస్తున్నారు. ఇంత భారీ రుసుములను భరించేందుకు విద్యాసంస్థలు ముందుకు రాకపోతే, అంతర్జాతీయ ప్రతిభావంతులు కెనడా, బ్రిటన్, జర్మనీ వంటి ఇతర దేశాల వైపు మొగ్గు చూపే అవకాశాలు ఉన్నాయని నిపుణులు హెచ్చరిస్తున్నారు. కాగా, ఈ ప్రతిపాదిత నిబంధనపై ప్రజాభిప్రాయాలు, అభ్యంతరాల స్వీకరణ కోసం ఫెడరల్ రిజిస్టర్‌లో ప్రచురించిన తర్వాత తుది నిర్ణయం తీసుకోనున్నారు.