విద్యార్థినుల భద్రతకు ప్రాధాన్యత ఇవ్వాలి

విజయవాడ మేజర్ న్యూస్ : విద్యార్థినులు విద్యలో రాణించి ఉన్నత శిఖరాలను అధిరోహించాలంటే వారి భద్రతకు అత్యంత ప్రాధాన్యత ఇవ్వాలని రాష్ట్ర సామాజిక సంక్షేమ బోర్డు చైర్మన్ పోతుల బాలకోటయ్య అన్నారు. ఆదివారం జి.కొండూరు మండలం కుంటముక్కలలోని డాక్టర్ బి.ఆర్. అంబేద్కర్ గురుకుల పాఠశాలలో ‘విద్యార్థినీ... జర భద్రం’ కార్యక్రమం నిర్వహించారు. ఈ సందర్భంగా ఆయన మాట్లాడుతూ విద్యార్థినుల భద్రతపై తల్లిదండ్రులు, ఉపాధ్యాయులు అప్రమత్తంగా ఉండాలని, సామాజిక మాధ్యమాలను జాగ్రత్తగా వినియోగించాలని సూచించారు. నేరాలు జరగకుండా ముందస్తు అవగాహన కల్పించడం అందరి బాధ్యతన్నారు. ఏసీపీ పి. రామచంద్రరావు మాట్లాడుతూ విద్యార్థినులపై అసాంఘిక చర్యలకు పాల్పడితే కఠిన చర్యలు తీసుకుంటామని హెచ్చరించారు. మైలవరం సీఐ కిషోర్ బాబు మాట్లాడుతూ విద్యార్థినులు తమ సమస్యలను తల్లిదండ్రులతో నిర్భయంగా పంచుకోవాలని సూచించారు. న్యాయవాది డి. సౌజన్య మహిళలపై జరిగే అకృత్యాల పట్ల అప్రమత్తంగా ఉండాలని కోరగా, సామాజికవేత్త గోళ్ల నారాయణరావు ‘జర భద్రం’ కార్యక్రమం భద్రతపై అవగాహన కల్పించేందుకేనని వివరించారు. కార్యక్రమంలో ఉయ్యూరు నరసింహారావు, అంగడి మురళీకృష్ణ, ప్రిన్సిపాల్ కె. బ్యూల, ఎస్సై సతీష్, మహిళా ఎస్సై గిరిజామణి తదితరులు పాల్గొన్నారు.           

స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.