చదువుకున్న యువత రాజకీయాల్లోకి రావాలి.. ప్రజాసేవలో ముందుండాలి

మచిలీపట్నం మేజర్ న్యూస్ : చదువుకున్న యువత రాజకీయాల్లోకి వచ్చి ప్రజాసేవలో కీలక బాధ్యతలు చేపట్టాలని ముఖ్యమంత్రి నారా చంద్రబాబు నాయుడు ఆకాంక్షించారు. ఆ దిశగా 29 ఏళ్ల వయసులోనే మచిలీపట్నం మేయర్‌గా ఎన్నికైన ఇంజినీరింగ్ పట్టభద్రురాలు, ముస్లిం మైనారిటీ యువతి అబ్దుల్ అబిదా విజయాన్ని ముఖ్యమంత్రి ప్రత్యేకంగా ప్రశంసించారు. యువత రాజకీయాల్లోకి రావాలన్న తన ఆలోచనకు అబ్దుల్ అబిదా నిలువెత్తు నిదర్శనమని అభిప్రాయపడ్డారు. ఉన్నత విద్యావంతురాలైన యువతి నగర ప్రథమ పౌరురాలిగా బాధ్యతలు చేపట్టడం శుభపరిణామమని పేర్కొంటూ ఆమెకు ప్రత్యేక అభినందనలు తెలిపారు. అదేవిధంగా మైనారిటీ వర్గాల అభ్యున్నతికి, పార్టీ బలోపేతానికి నిరంతరం కృషి చేస్తున్న మైనారిటీ కార్పొరేషన్ డైరెక్టర్ డాక్టర్ హసీం బేగ్ సేవలను కూడా చంద్రబాబు అభినందించారు. గతంలోనూ పలు సందర్భాల్లో డాక్టర్ హసీం బేగ్ నిబద్ధత, నాయకత్వ పటిమను ముఖ్యమంత్రి ప్రశంసించారు. తాజాగా మచిలీపట్నం మేయర్‌గా అబ్దుల్ అబిదా భారీ మెజారిటీతో విజయం సాధించడంతో ఆమెతో పాటు డాక్టర్ హసీం బేగ్‌ను ప్రత్యేకంగా అభినందించారు.