విదేశీయుల వివరాలు 24 గంటల్లో ఆన్‌లైన్‌లో నమోదు చేయాలి

నెల్లూరు, అర్బన్, క్రైమ్  మేజర్ న్యూస్  :  జిల్లాలోని హోటళ్లు, గెస్ట్‌హౌస్‌లు, హాస్టళ్లు, ఆశ్రమాలు, సత్రాలు, హాస్పిటళ్లు, మతపరమైన ప్రార్థనా స్థలాలు, విద్యాసంస్థలు, ఆసుపత్రులు, అలాగే విదేశీయులకు వసతి కల్పించే ఇతర సంస్థల నిర్వాహకులు తమ వద్ద బస చేసే ప్రతి విదేశీయుడి వివరాలను తప్పనిసరిగా నమోదు చేయాలని జిల్లా ఎస్పీ డా. అజిత వేజెండ్ల సూచించారు. విదేశీయుల రాక, బస, వారి వివరాలను నిర్దేశిత నిబంధనల ప్రకారం నమోదు చేయడంతోపాటు, ఆ వివరాలను ఫామ్-III ద్వారా 24 గంటల్లో ఆన్‌లైన్‌లో సమర్పించాలని స్పష్టం చేశారు.ఈ నిబంధనలు భారత సంతతికి చెందిన విదేశీయులు (ఓ సి ఐ –ఓవర్సీస్ సిటిజన్ ఆఫ్ ఇండియా)కార్డు కలిగినవారికి, భూటాన్‌, నేపాల్‌ దేశాల పౌరులకు కూడా వర్తిస్తాయని తెలిపారు. ఇతర దేశాల నుంచి నెల్లూరు జిల్లాకు వచ్చే విదేశీయుల వివరాలను సంబంధిత సంస్థలు తప్పనిసరిగా నమోదు చేయాలని పేర్కొన్నారు.ది ఇమ్మిగ్రేషన్‌ అండ్‌ ఫారినర్స్‌ యాక్ట్‌–2025లోని సెక్షన్‌ 8 ప్రకారం, విదేశీయుల వివరాలను ఫామ్-IIIలో నమోదు చేసి, https://indianfrro.gov.in/formIII పోర్టల్‌ ద్వారా 24 గంటల్లో సంబంధిత ఎఫ్ ఆర్ ఆర్ ఓ/ఎఫ్ ఆర్ ఓ అధికారులకు తెలియజేయాలని సూచించారు. ఈ నిబంధనలను పాటించని సంస్థల నిర్వాహకులపై సెక్షన్‌ 23(బి) ప్రకారం రూ.50 వేల నుంచి జరిమానా విధించడంతోపాటు, జైలు శిక్ష, క్రిమినల్‌ ప్రాసిక్యూషన్‌కు కూడా అవకాశం ఉంటుందని హెచ్చరించారు.జిల్లాకు వచ్చే విదేశీయుల నుంచి చెల్లుబాటు అయ్యే ప్రయాణ పత్రాలను పరిశీలించాలని, వారి వీసా, పాస్‌పోర్టు వివరాలను నమోదు చేయాలని ఎస్పీ సూచించారు. నిబంధనలను కచ్చితంగా పాటిస్తూ పోలీసు, విదేశీయుల నమోదు విభాగాలకు సహకరించాలని సంబంధిత సంస్థల యాజమాన్యాలకు విజ్ఞప్తి చేశారు.