వేమూరు ప్రభుత్వ వైద్యశాలలో మెగా వైద్య శిబిరం

వేమూరు (భట్టిప్రోలు), మేజర్ న్యూస్: దేశ ప్రధాన మంత్రి నరేంద్ర మోదీ జన్మదిన వేడుకలను పురస్కరించుకుని సేవా సంకల్ప అభియాన్” కార్యక్రమంలో భాగంగా మంగళవారం వేమూరు ప్రభుత్వ సామాజిక ఆరోగ్య కేంద్రంలో మెగా వైద్య శిబిరంను నిర్వహించారు. కార్యక్రమంలో శాసనసభ్యులు, మాజీ మంత్రి నక్కా ఆనంద బాబు పాల్గొని వైద్య శిబిరాన్ని ప్రారంభించారు. ఈ సందర్బంగా ఆయన మాట్లాడుతు 25 ఎళ్ల సుదీర్ఘ అనుభవంతో ప్రధాని మోడీ సమర్థవంతమైన పరిపాలన అందిస్తున్నారన్నారు. ఆయన జన్మదినోత్సవాన్ని పురస్కరించుకుని ఇటువంటి సేవా కార్యక్రమాలు నిర్వహించటం అభినందనీయమన్నారు. ఈ మెగా వైద్య శిబిరంలో ప్రజలకు మెరుగైన వైద్య సేవలు అందించేందుకు వివిధ వైద్య విభాగాలకు చెందిన సేవలను అందుబాటులో ఉంచారన్నారు. ఇందులో భాగంగా రక్త పరీక్షలు, కంటి పరీక్షలు, ఎక్స్‌రే, హెచ్‌ఐవీ కౌన్సెలింగ్, ఫిజియోథెరపీ, ప్రసూతి మరియు శిశు వైద్య సేవలు చేశారు. ఈ సందర్భంగా ఎమ్మెల్యే ఆనంద బాబు ఆసుపత్రిలో అందిస్తున్న వైద్య సేవల వివరాలను తెలుసుకుని, వైద్య శిబిరానికి వచ్చిన ప్రజలకు అందుతున్న సేవలను పరిశీలించారు. ప్రజలు ఇలాంటి వైద్య శిబిరాలను సద్వినియోగం చేసుకుని, వ్యాధులను ముందుగానే గుర్తించి తగిన చికిత్స పొందాలని, తమ ఆరోగ్యంపై ప్రత్యేక శ్రద్ధ వహించాలని సూచించారు.
ప్రజల ఆరోగ్య పరిరక్షణ, వ్యాధుల ముందస్తు గుర్తింపు, అవసరమైన వైద్య సేవలను ప్రజలకు చేరువ చేయడమే ఈ మెగా వైద్య శిబిరం ప్రధాన ఉద్దేశమన్నారు, సమావేశంలో టిడిపి రాష్ట్ర అధికార ప్రతినిధి అప్పసాని రాజేష్, జొన్నలగడ్డ విజయబాబు, హాస్పటల్ అభివృద్ధి కమిటీ సభ్యులు వేల్పుల రవి ప్రసాద్, వైద్యాధికారులు, వైద్యశాల సిబ్బంది పాల్గొన్నారు.