వర్షపు నీటికి కడ్డుకట్టగా అక్రమ కట్టడాలు

వర్షపు నీటికి అడ్డుకట్టగా అక్రమ కట్టడాలు

డ్రైనేజీలపై ఆక్రమణల తొలగింపునకు చర్యలు.. కమిషనర్ ఆదేశాలు

ప్రొద్దుటూరు, మేజర్ న్యూస్:
భారీ వర్షాలకు ప్రొద్దుటూరు పట్టణంలోని పలు ప్రాంతాలు జలమయమవుతున్న నేపథ్యంలో సమస్యకు శాశ్వత పరిష్కారం చూపేందుకు పురపాలక అధికారులు చర్యలు చేపట్టారు. ప్రధానంగా మురుగు కాలువలు ఆక్రమణకు గురికావడం, డ్రైనేజీలపై అక్రమ కట్టడాలు, బంకులు ఏర్పాటు చేయడం, కాలువల్లో ప్లాస్టిక్ వ్యర్థాలు పేరుకుపోవడం వల్ల వర్షపు నీరు సక్రమంగా ప్రవహించక ఇబ్బందులు తలెత్తుతున్నట్లు అధికారులు గుర్తించారు. ఈ నేపథ్యంలో మంగళవారం తెల్లవారుజామున 4 గంటల నుంచే కమిషనర్ తూతిక శ్రీనివాస విశ్వనాథ్ ఆధ్వర్యంలో పురపాలక సిబ్బంది పట్టణంలోని పలు ప్రాంతాలను పరిశీలించారు. వర్షపు నీరు నిలిచిపోయిన ప్రాంతాలను, మురుగు కాలువల్లో పేరుకుపోయిన సిల్ట్, ప్లాస్టిక్ వ్యర్థాలను పరిశీలించి, వెంటనే తొలగించేలా పారిశుధ్య కార్మికులను ఆదేశించారు. డ్రైనేజీలపై అక్రమంగా నిర్మాణాలు చేపట్టి వ్యాపారాలు నిర్వహిస్తున్న యజమానులకు కమిషనర్ తీవ్ర హెచ్చరికలు జారీ చేశారు. కాలువల ప్రవాహానికి అడ్డుగా ఉన్న ఆక్రమణలను స్వచ్ఛందంగా తొలగించుకోవాలని, లేకపోతే పురపాలక శాఖ నిబంధనల మేరకు చర్యలు తీసుకుంటుందని స్పష్టం చేశారు. పట్టణంలోని డ్రైనేజీలపై ఉన్న అక్రమ కట్టడాలు, బంకులను దశలవారీగా తొలగించేందుకు సమగ్ర ప్రణాళిక సిద్ధం చేయాలని టౌన్‌ ప్లానింగ్ అధికారులను కమిషనర్ ఆదేశించారు. వర్షపు నీరు సజావుగా వెళ్లేలా కాలువల సామర్థ్యాన్ని మెరుగుపరచడంతో పాటు, డ్రైనేజీల్లో ప్లాస్టిక్ వ్యర్థాలు వేయకుండా ప్రజలకు అవగాహన కల్పించాలని సూచించారు.