సీఎం పర్యటన ఏర్పాట్లను పరిశీలించిన ఎమ్మెల్యే కాకర్ల సురేష్, కలెక్టర్ హిమాన్షు శుక్ల

సీఎం పర్యటన ఏర్పాట్లను పరిశీలించిన ఎమ్మెల్యే కాకర్ల సురేష్, కలెక్టర్ హిమాన్షు శుక్ల

➖ పకడ్బందీగా ఏర్పాట్లు పూర్తి చేయాలని అధికారులకు దిశానిర్దేశం

వరికుంటపాడు, మేజర్ న్యూస్: ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కళ్యాణ్  ఉదయగిరి నియోజకవర్గ పర్యటన ఈనెల 29న ఖరారయ్యే అవకాశం ఉన్నందున  ఏర్పాట్లు వేగంగా కొనసాగుతున్నాయి. 
ఉదయగిరి నియోజకవర్గం వరికుంటపాడు మండలం రామాపురంలో నిర్వహించనున్న జీ రామ్ జీ పల్లెపండుగ కార్యక్రమంలో సీఎం చంద్రబాబు నాయుడు, ఉప ముఖ్యమంత్రి పవన్ కళ్యాణ్ పాల్గొననున్న నేపథ్యంలో పర్యటన ఏర్పాట్లను మంగళవారం ఉదయగిరి ఎమ్మెల్యే కాకర్ల సురేష్, జిల్లా కలెక్టర్ హిమాన్షు శుక్ల అధికారులతో కలిసి పరిశీలించారు.
రామాపురంలో ఏర్పాటు చేస్తున్న హెలిప్యాడ్, సభా ప్రాంగణం, పార్కింగ్ ప్రాంతాలను పరిశీలించి అధికారులకు పలు సూచనలు చేశారు. ముఖ్యమంత్రి, ఉప ముఖ్యమంత్రి పర్యటనకు పెద్ద సంఖ్యలో ప్రజలు హాజరయ్యే అవకాశం ఉన్నందున ప్రజలకు ఎటువంటి ఇబ్బందులు కలగకుండా అన్ని ఏర్పాట్లను సమన్వయంతో పకడ్బందీగా పూర్తి చేయాలని ఆదేశించారు.
వివిధ శాఖలకు అప్పగించిన బాధ్యతలు, ఏర్పాట్ల పురోగతిపై వివరాలు తెలుసుకున్నారు. అన్ని శాఖలు పరస్పర సమన్వయంతో పనిచేస్తూ ముఖ్యమంత్రి పర్యటనకు సంబంధించిన ఏర్పాట్లలో ఎటువంటి లోటుపాట్లు లేకుండా చూడాలని ఆదేశించారు. భద్రత, ట్రాఫిక్ నియంత్రణ, వాహనాల పార్కింగ్, విద్యుత్, తాగునీరు, పారిశుద్ధ్యం, వైద్య సేవలు, ప్రజలకు అవసరమైన మౌలిక వసతుల కల్పన తదితర అంశాలపై ప్రత్యేక దృష్టి సారించాలని అధికారులకు సూచించారు.
ముఖ్యమంత్రి పర్యటనను విజయవంతంగా నిర్వహించేందుకు అధికారులు నిరంతరం సమన్వయం చేసుకుంటూ ఏర్పాట్లను పర్యవేక్షించాలని ఎమ్మెల్యే, కలెక్టర్ స్పష్టం చేశారు. కార్యక్రమానికి వచ్చే ప్రజలకు ఎటువంటి అసౌకర్యం కలగకుండా అవసరమైన అన్ని చర్యలు చేపట్టాలని సూచించారు. కలెక్టర్ వెంట జాయింట్ కలెక్టర్ మొగిలి వెంకటేశ్వర్లు, ఏఎస్పి దీక్ష, ఆర్డీవో పావని, డీఎస్పీలు, వివిధ శాఖల అధికారులు ఉన్నారు.