వైసీపీ నుండి జనసేన లోనికి భారీగా చేరికలు

ఉండి, మేజర్ న్యూస్ స్థానిక సంస్థల ఎన్నికల నేపథ్యంలో ఉండి మండలంలో జనసేన పార్టీలోనికి వైసీపీ నుండి భారీగా చేరికలు ఊపందుకున్నాయి. ఉండి మండలం ఎన్‌ఆర్‌పీ అగ్రహారం మాజీ సర్పంచ్, వైసిపి సీనియర్ నాయకులు  మునుకోలు సింహాచలం ఆధ్వర్యంలో బీసీ కాలనీకి చెందిన సుమారు 80 మంది యువత గురువారం జనసేన పార్టీలో చేరారు. నరసాపురం పార్లమెంట్ నియోజకవర్గ సమన్వయ కమిటీ సభ్యులు పీవీఎల్ నరసింహరాజు, ఉమ్మడి పశ్చిమగోదావరి జిల్లా గ్రంథాలయ సంస్థ చైర్మన్ జుత్తుగ నాగరాజు సమక్షంలో జనసేన తీర్థం పుచ్చుకున్నారు. పార్టీలో చేరిన యువతకు నాయకులు జనసేన కండువాలు కప్పి సాదరంగా జనసేన పార్టీ లోనికి ఆహ్వానించారు. ఈ సందర్భంగా మునుకోలు సింహాచలం మాట్లాడుతూ గ్రామాల అభివృద్ధికి ఉప ముఖ్యమంత్రి పవన్ కళ్యాణ్ చేస్తున్న కృషికి ఆకర్షితులై బీసీ కాలనీ యువతతో కలిసి జనసేన పార్టీలో చేరినట్లు తెలిపారు. రానున్న స్థానిక సంస్థల ఎన్నికల్లో పార్టీ బలోపేతానికి తమ వంతు కృషి చేస్తామని అన్నారు. అనంతరం పీవీఎల్ నరసింహరాజు, జుత్తిగ నాగరాజు మాట్లాడుతూ పార్టీలో చేరిన యువతకు పార్టీలో సముచిత ప్రాధాన్యత కల్పిస్తూ, గ్రామస్థాయిలో పార్టీని బలోపేతం చేసేందుకు కృషి చేస్తామని మునుకోలు సింహాచలం సహచర నాయకుల సమన్వయంతో పార్టీ అభివృద్ధికి కృషి చేయాలని తెలిపారు. ప్రజా సమస్యల పరిష్కారానికి, గ్రామాల అభివృద్ధికి పార్టీ శ్రేణులు సమన్వయంతో పనిచేయాలని పిలుపునిచ్చారు. ఈ కార్యక్రమంలో జనసేన మండల పార్టీ అధ్యక్షులు వెంకటేశ్వరరావు, నాయకులు, కార్యకర్తలు, బీసీ కాలనీ యువత పాల్గొన్నారు.