వైజాగ్ నుంచి కజాన్.. ఆంధ్రప్రదేశ్–రష్యా భాగస్వామ్యానికి నూతన దిశ

విశాఖపట్నం, మేజర్‌న్యూస్‌ :

భారత్–రష్యా మధ్య చిరకాలంగా కొనసాగుతున్న వ్యూహాత్మక స్నేహబంధాన్ని ఆర్థిక, పారిశ్రామిక భాగస్వామ్యంగా మరింత బలోపేతం చేసేందుకు కృషి చేస్తున్నట్లు రాష్ట్ర ఐటీ, విద్య, ఎలక్ట్రానిక్స్, ఆర్టీజీ శాఖల మంత్రి నారా లోకేష్ తెలిపారు. ఆంధ్రప్రదేశ్–రష్యా మధ్య ప్రాంతీయ భాగస్వామ్యాలను ప్రపంచ స్థాయి అవకాశాలుగా మలచేందుకు విస్తృత అవకాశాలు ఉన్నాయని పేర్కొన్నారు.
విశాఖపట్నంలో జరుగుతున్న సీఐఐ భాగస్వామ్య సదస్సులో భాగంగా కాన్ఫరెన్స్ హాల్‌-3 హాల్ లో 'విశాఖ నుంచి కజాన్ వరకు.. ప్రాంతీయ భాగస్వామ్యాల నుంచి ప్రపంచ అవకాశాల దిశగా' అంశంపై నిర్వహించిన ప్రత్యేక సమావేశంలో మంత్రి నారా లోకేష్ ప్రారంభోపన్యాసం చేశారు. ఈ సందర్భంగా రష్యా రాయబారి డెనిస్ అలిపోవ్, రష్యా ప్రతినిధి బృందానికి స్వాగతం పలుకుతూ, ఆంధ్రప్రదేశ్‌తో రష్యా భాగస్వామ్యాన్ని మరింత విస్తరించేందుకు రాష్ట్ర ప్రభుత్వం సిద్ధంగా ఉందని తెలిపారు. రష్యాతో తన అనుబంధం సెయింట్ పీటర్స్‌బర్గ్ అంతర్జాతీయ ఆర్థిక సదస్సు పర్యటనతో మరింత బలపడిందని, ఆ సందర్భంగా రష్యాలోని వివిధ పారిశ్రామిక సంస్థల ప్రతినిధులతో పాటు Tatarstan ప్రాంత నాయకత్వంతో సమావేశమయ్యే అవకాశం లభించిందని చెప్పారు. అక్కడి పారిశ్రామిక అభివృద్ధి, పెట్టుబడుల అవకాశాలు, అభివృద్ధి దృక్పథం తనను ఆకట్టుకున్నాయని తెలిపారు. గౌరవ ప్రధానమంత్రి నరేంద్ర మోదీ, రష్యా అధ్యక్షుడు వ్లాదిమిర్ పుతిన్ నాయకత్వంలో బలపడిన భారత్–రష్యా సంబంధాలను రాష్ట్ర స్థాయిలోనూ మరింత ముందుకు తీసుకెళ్లాలని ఆకాంక్షించారు.
*కీలక ఖనిజాల నుంచి అణుశక్తి వరకు.. సాంకేతిక సహకారానికి ప్రాధాన్యం*
కీలక ఖనిజాలు, మెటలర్జీ, తయారీ, చిన్న మాడ్యులర్ అణు రియాక్టర్లు, కృత్రిమ మేధస్సు, పరిశోధన, సాంకేతిక పరిజ్ఞాన మార్పిడి రంగాల్లో పరస్పర సహకారాన్ని విస్తరించవచ్చని మంత్రి నారా లోకేష్ తెలిపారు. మెటలర్జీ, తయారీ, ఓడరేవుల మౌలిక సదుపాయాలు, సముద్ర రవాణా, ఆర్థిక లావాదేవీలకు అనువైన చెల్లింపు వ్యవస్థలు, బలమైన సరఫరా వ్యవస్థల అభివృద్ధిపై సమావేశంలో చర్చించారు. రష్యాలోని తతారిస్తాన్ ప్రతినిధుల భాగస్వామ్యంతో ఇరు ప్రాంతాల వ్యాపార సంస్థల మధ్య ప్రత్యక్ష అనుసంధానం, సంయుక్త పెట్టుబడులు, మార్కెట్ అవకాశాలను విస్తరించే అంశాలు ప్రాధాన్యత సంతరించుకున్నాయి. ఆంధ్రప్రదేశ్‌లో పెట్టుబడులు పెట్టే పారిశ్రామికవేత్తలకు ప్రభుత్వం మూడు ప్రధాన భరోసాలను అందిస్తోందని మంత్రి నారా లోకేష్ స్పష్టం చేశారు.

- *వేగం (Speed):* పెట్టుబడి ప్రతిపాదనల పరిశీలన నుంచి ప్రాజెక్టుల అమలు వరకు వేగవంతమైన నిర్ణయాలు, సత్వర అనుమతులు.
- *స్థిరత్వం (Stability):* ప్రభుత్వ విధానాలు, పెట్టుబడి హామీల విషయంలో దీర్ఘకాలిక విశ్వసనీయత.
- *సేవ (Service):* పెట్టుబడిదారులకు నిరంతర సహకారం, ప్రాజెక్టుల అమలులో పూర్తి స్థాయి ప్రభుత్వ మద్దతు.

పెట్టుబడిదారులకు ఇచ్చిన ప్రోత్సాహకాల హామీలను సకాలంలో అందించేందుకు ఎస్క్రో విధానాన్ని, పెట్టుబడులపై ఇచ్చిన హామీలకు రక్షణ కల్పించేందుకు ఇన్వెస్టర్ ప్రొటెక్షన్ చట్టాన్ని తీసుకొస్తున్నట్లు వివరించారు. ఈ చర్యలు రాష్ట్రంలో పెట్టుబడులకు మరింత విశ్వసనీయ వాతావరణాన్ని కల్పిస్తాయని తెలిపారు. భారత్–రష్యా చిరకాల స్నేహబంధాన్ని ఆంధ్రప్రదేశ్ కేంద్రంగా మరింత బలోపేతం చేస్తూ, ప్రాంతీయ భాగస్వామ్యాలను అంతర్జాతీయ పెట్టుబడులు, పారిశ్రామిక అభివృద్ధి, సాంకేతిక సహకారానికి వేదికగా మలచాలని మంత్రి నారా లోకేష్ పిలుపునిచ్చారు.
భారత్–ఆంధ్రప్రదేశ్‌తో భాగస్వామ్య విస్తరణకు రష్యా పూర్తి మద్దతు!: భారత్‌లో రష్యా రాయబారి డెనిస్ అలిపోవ్

భారత్‌తో పాటు ఆంధ్రప్రదేశ్‌తోనూ వాణిజ్య, పారిశ్రామిక, సాంకేతిక భాగస్వామ్యాన్ని మరింత విస్తరించేందుకు రష్యా పూర్తి ఆసక్తితో ఉందని భారత్‌లో రష్యా రాయబారి డెనిస్ అలిపోవ్ తెలిపారు. విశాఖపట్నంలో జరుగుతున్న సీఐఐ భాగస్వామ్య సదస్సులో రష్యా ప్రతినిధి బృందానికి, తనకు అందించిన ఆత్మీయ ఆతిథ్యానికి ఆయన కృతజ్ఞతలు తెలిపారు. రాష్ట్ర మంత్రి నారా లోకేష్ రష్యా ప్రతినిధి బృందానికి కేటాయించిన సమయం, అందించిన ప్రోత్సాహం, సహకారంపై ప్రత్యేకంగా ధన్యవాదాలు తెలియజేశారు.
భారత్–రష్యా మధ్య బలమైన వ్యూహాత్మక సంబంధాలతో పాటు, రష్యాలోని తతారిస్తాన్ సహా వివిధ ప్రాంతాలకు, ఆంధ్రప్రదేశ్‌కు మధ్య ప్రాంతీయ భాగస్వామ్యాన్ని విస్తరించేందుకు విస్తృత అవకాశాలున్నాయని పేర్కొన్నారు. ఇరు ప్రాంతాల పారిశ్రామిక సంస్థలు, వ్యాపార వర్గాల మధ్య సహకారాన్ని పెంపొందించడం ద్వారా కొత్త పెట్టుబడులు, సంయుక్త ప్రాజెక్టులకు మార్గం సుగమం అవుతుందని తెలిపారు.
*40 ప్రాధాన్యతా ప్రాజెక్టులు.. 50 బిలియన్ డాలర్ల పెట్టుబడుల లక్ష్యం*
భారత్–రష్యా ఇరు పక్షాలు కలిసి సుమారు 40 కొత్త ప్రాధాన్యతా పెట్టుబడి ప్రాజెక్టులకు మద్దతు ఇచ్చే అంశాన్ని పరిశీలిస్తున్నాయని, తద్వారా 50 బిలియన్ అమెరికన్ డాలర్ల పరస్పర పెట్టుబడుల లక్ష్యాన్ని చేరుకోవాలని భావిస్తున్నట్లు డెనిస్ అలిపోవ్ వెల్లడించారు. నావిగేషన్ వ్యవస్థలు, కృత్రిమ మేధస్సు ఆధారిత విమానాశ్రయ పరిష్కారాలు వంటి ఆధునిక సాంకేతిక రంగాల్లోనూ పరస్పర సహకారానికి అవకాశాలున్నాయని వివరించారు. భారత్‌లో అణు విద్యుత్ కేంద్ర నిర్మాణంలో భాగస్వామిగా ఉన్న రష్యాకు అణుశక్తి రంగంలో విశేష అనుభవం, అత్యాధునిక సాంకేతిక పరిజ్ఞానం ఉందని తెలిపారు. చిన్న మాడ్యులర్ అణు రియాక్టర్లు (SMRs), తేలియాడే అణు రియాక్టర్ల వంటి వినూత్న ప్రాజెక్టులను ఇప్పటికే అమలు చేసినట్లు వివరించారు. సురక్షితమైన, పర్యావరణహితమైన అణుశక్తి సాంకేతికత ద్వారా భవిష్యత్తులో పెరుగుతున్న విద్యుత్ అవసరాలను తీర్చవచ్చని, ముఖ్యంగా ప్రపంచవ్యాప్తంగా వేగంగా విస్తరిస్తున్న భారీ డేటా కేంద్రాలకు అవసరమైన విద్యుత్ సరఫరాలో ఈ సాంకేతికత కీలకంగా నిలుస్తుందని పేర్కొన్నారు. బ్రహ్మోస్‌తో భారత్–రష్యా మధ్య ఇప్పటికే బలంగా ఉన్న రక్షణ సంబంధాలను మరింత విస్తరించేందుకు అవకాశాలు ఉన్నాయని డెనిస్ అలిపోవ్ తెలిపారు. రక్షణ రంగం ఇరు దేశాల భాగస్వామ్యంలో అత్యంత ఆశాజనకమైన విభాగమని, బ్రహ్మోస్ వంటి సంయుక్త ప్రాజెక్టులు ఈ సహకారానికి నిదర్శనమని పేర్కొన్నారు. భవిష్యత్తులో ఈ రంగంలో పరస్పర సహకారాన్ని మరింత ముందుకు తీసుకెళ్లాల్సిన అవసరం ఉందన్నారు. భారత్, రష్యా మధ్య అనేక అంశాల్లో ఉమ్మడి ప్రయోజనాలు, సమానమైన అభివృద్ధి దృక్పథం ఉన్నాయని రష్యా రాయబారి తెలిపారు.  .
ఆంధ్రప్రదేశ్‌తో భాగస్వామ్యాన్ని మరింత ముందుకు తీసుకెళ్లేందుకు మంత్రి నారా లోకేష్ అందించిన ప్రోత్సాహం, సహకారం స్ఫూర్తినిచ్చాయని పేర్కొంటూ, రాష్ట్రంతో ఆర్థిక, పారిశ్రామిక సంబంధాలను మరింత బలోపేతం చేసేందుకు రష్యా పూర్తి సంసిద్ధతతో ఉందని భారత్‌లో రష్యా రాయబారి డెనిస్ అలిపోవ్ స్పష్టం చేశారు. ప్రత్యేక సమావేశంలో జ్లాటా 
అంతుషెవా (రష్యా వాణిజ్య ప్రతినిధి బృందం- జీఆర్ & ఫైనాన్స్ విభాగం లీడ్), 
లెనార్ జమలీవ్ (తాతరిస్తాన్ రిపబ్లిక్ పెట్టుబడుల అభివృద్ధి సంస్థ డిప్యూటీ హెడ్), 
ఎకటెరీనా అస్టాషినా (రోసాటమ్ సౌత్ ఏషియా బిజినెస్ డెవలప్ మెంట్ మేనేజర్) తదితరులు పాల్గొన్నారు.